Naz l’Asociación Grana n’alcordanza de Yolanda Huergo, que va instituyir un premiu a trabayos d’investigación n’asturianu

Esti sábadu va dase a conocer públicamente l’Asociación Grana, n’alcordanza de Yolanda Huergo. Promovida por un grupu de persones cercanu a la xixonesa, yá sía pol tratu personal o por militancia, va entamar unes xornaes na so memoria y instuyir un premiu a trabayos d’investigación n’asturianu de cualquier temática.

N’agostu del 2020 dexábanos de manera prematura, pero la buelga d’Huergo ye difícil d’esborriar. Por tolo lo que fixo en campos tan variaos como la reivindicación llingüística, la defensa de los derechos humanos o la militancia política dende l’asturianismu, y pol enfotu de los suyos de nun dexar morrer el so espíritu.

Quedó amosáu va un añu col actu entamáu pola Xunta pola Defensa de la Llingua Asturiana nel Muséu del Pueblu d’Asturies y agora pola iniciativa entamada por un piñu de persones cercanes a Huergo que mañana va dase a conocer al meudía na Casa Conceyu de Xixón, onde trabayaba como vocera de Podemos-EQUO. Ye l’Asociación Grana, que naz pa esparder la so forma d’entender el país y el mundu, y pa ser un espaciu de debate y reflexón, abiertu a toles sensibilidaes, sobre Asturies y sobre toles causes que la esmolecíen.

Va tar presidida por Iris Díaz, con Pablo Rodríguez como secretariu y el so compañeru, Rubén Fernández Ardura, como ayalgueru. Ente les actividaes previstes, que se van esplicar mañana con detalle, ta la creación d’unes xornaes de calter añal o biañal, y la creación d’un premiu a trabayos d’investigación en llingua asturiana.