Naz la plataforma cívica “Cellagú” en defensa del patrimoniu asturianu

La plataforma cívica "Cellagú" presentóse ayeri oficialmente en Mieres col oxetivu de lluchar contra la destrucción del patrimoniu arqueolóxicu y etnográficu asturianu". La plataforma, integrada ente otros pol conocíu investigador de la etnografía y cultura popular asturianes Alberto Álvarez Peña, entamó les sos actividaes denunciando la destrucción del castru del Picu'l Castiil.lu en Cabezón, conceyu de L.lena, un yacimientu catalogáu y conocíu dende últimos del sieglu XIX nel que l'asociación denuncia que s'esfarrapló dafechu tol so rexistru arqueolóxicu pa la construcción d'un depósitu d'agua. "Cellagú" diz qu'ello nun ye llamentablemente ún casu escepcional, apuntando situaciones asemeyaes en castros como' del Picu Mancobiu en conceyu Parres, y denunció que n'Asturies fáense davezu obres nes que nun se fai l'obligáu siguimientu arqueolóxicu pa que nun asocedan desastres d'esti calter.

La plataforma, que garra'l nome del famosu castru uvieín que se sacrificó llegalmente pa consentir l'ampliación d'una cantera, quier esixir el cumplimientu de la llei de Patrimoniu Asturianu y acusa al Gobiernu Asturianu de facer dexación de les sos funciones en materia de protección a los restos arqueolóxicos y bienes culturales del país, polo que-yos pide responsabilidaes directes a los dos máximos representantes de la Conseyería de Cultura, la Conseyera Ana Rosa Migoya y el Director Xeneral Carlos Madera. Pa debatir les consecuencies de la so política, "Cellagú" asitiólos a dambos a celebrar un debate sobre patrimoniu etnográficu asturianu nel escenariu de la Xunta Xeneral del Principáu. Otramiente, "Cellagú" culpa tamién a l'alministración local de los estrozos en patrimoniu, denunciando que bien de vegaes son los mesmos conceyos los que nun faen casu de les cartes arqueolóxiques qu'ellabora la Conseyería.