Naide protesta pola térmica d’Avilés

El Colectivu Ecoloxista d'Avilés treslladó-yos esta selmana a les asociaciones de vecinos d'Avilés, Castrillon, Corvera y Gozon un resume colos graves problemes ambientales qu'el colectivu atalanta que va xenerar el proyectu de la empresa Isastur pa instalar en Valliniello dos grupos térmicos nel llugar onde s'asitia l'antigua térmica d'Ensidesa (na semeya).

Según espliquen los ecoloxistes d'Avilés, mientres que les asociaciones de vecinos y otros movimientos sociales de tol estáu tan a la que salta en cuantes se da anuncia de la posible instalación d'una central térmica nos sos respectivos llugares, l'anuncia del proyectu en valliniello, que llegó a ser la parroquia más contaminada d'Europa en tiempude la instalación d'ensidesa, nunse rexistren voces a la escontra de la iniciativa d'Isastur. Los ecoloxistes remembren qu'esti grupu térmicu pasaría a ser el mayor d'Asturies y que taría a mui poca distancia d'una zona con importante volume de población.

El grupu conservacionista d'Avilés fai agraviu comoparativu con otros llugares, y asina rescampla que na ciudá de Torrelavega (Cantabria) onde tamién trancaron abondes instalaciones industriales, toles asociaciones vecinales tan trabayando nuna plataforma conxunta escontra'l proyectu pa poner nel llugar un grupu térmicu. Otru casu que contrasta más cola situación asturiana dase en Madrid onde los partíos políticos d'izquierda - IU y PSOE- con representación parlamentaria qu'equí tan al favor d'esti nuevu grupu presentaron una moción conxunta n'Asamblea de Madrid contra la instalación d'un grupu térmicu en Morata de Tajuña.

La cercanía al noyu de población que representa Avilés ye ún de los argumentos que más sorrayen los ecoloxistes pa mostrar la so estrañeza énte l'aceptación silente que ta faciendo'l pueblu d'Avilés col proyectu de la térmica. El colectivu remembra que les térmiques de ciclu combináu que se cuenta poner n'Avilés funcionen con gas natural que, con ser un combustible más llimpio que'l carbón y más eficiente en rendimientu nun ye tampoco llimpiu dafechu siendo l'alta potencia del proyectu que se propón un factor preocupante pal grupu ecoloxista, qu'alerta d'impactos "evidentes" en términos d'emisión de contaminantes, altu consumu d'agua pa la refrixeración de los grupos y necesidá de llinies d'alta tensión pa evacuar la corriente que se produza.

La contaminación d'un grupu térmicu de gas d'ochocientos MW perítenla los ecoloxistes nunes 290 tonelaes a la hora de mónóxidu de carbono (CO2), 510 Kg a la hora de dióxidu d'azufre (SO2) y 250 Kg a la hora d'óxidu de nitróxenu (NOX), contaminante esti últimu que xubiría esponencialmente en casu de fallar el suministru de gas y precisar la térmica de quemar gas-oil. Estos datos van nel informe que los ecoloxistes-yos unviaron a les asociaciones de vecinos xunta una previsión de los puestos de trabayu que daría la central, que nel meyor escenariu posible nunca diben pasar de los 50.