Nacieron les primeres camaes de Gochu Celta en centru del SERIDA

El plan de recuperación del Gochu Celta que roblaren l'Asociación de Criadores del Gochu Celta y la Conseyería de Mediu Rural y Pesca'l pasáu mes de mayu y que tien acutada una partida presupuestaria de 92.500 euros dio los sos primeros pasos. Según anuncia oficial de la conseyería de Mediu Rural, el centru de multiplicación de la especie en Villaviciosa tien yá un total de 17 críes, 11 machos y seyes femes nacíes de dos de les seyes goches qu'igüen el núcleu reproductor de la especie, que cuenta tamién con dos machos. El plan del SERIDA pretende llegar a tener un núcleu reproductor de 10 machos y 20 femes.

Los oxetivos del programa asítiense en finxos concretos como l'actuar una reserva de xenes de la raza, permitir la xuba de los censos o tamién maximizar la variedá xenética de los mesmos torgando la endogamia. L'oxetivu final nun ye otru que'l de la recuperación de la raza autóctona del gochu celta asturianu, que tuvo a piques de desapaecer. Pa desarrollar esti plan que se concibiere en mayu, Principáu y asociación de Criadores de Gochu Celta firmaron ayeri'l conveniu en que s'apauten los compromisos concretos de cada parte nel proyectu de recuperación del Gochu Celta y nel que se comprometen los 92.500 euros que s'anunciaren en mayu dientro d'un plan que va ser a trés años. Los gastos del SERIDA nel so llabor y la xestión del llibru xenealóxicu de la especie po parte de l'Asociación de criadores son los principales costes cubiertos col plan, neto que les actuaciones que se precisen no tocante a promoción de la especie y los sos productos

Esta raza de gochu, mayoritaria n'Asturies hasta bien metíu el sieglu XX, tuvo nun tris de desapaecer pola meyor adaptación a la producción intensiva d'otres races de gochos y la popoularidá qu'algamaron na posguerra otres especies mayores productores d'untu, que desaniciaron al gochu celta hasta que namás quedaron d'elli pocos exemplares, los más d'ellos en conceyos del occidente. Asina, los miembros de l'asociación de criadores depués d'unos años pañando los últimos exemplares del del país decidieron a primeros de la década del 2000 formar una asociacion pa defender la raza y conservala, pero non solo con aspiraciones de tener una curiosidá biolóxica metida na cubil, sinon como alternativa económica. Como muestra en Galicia y Portugal la carne d'estos gochos cotízase a más de 40 euros el kilu.

El tueru del gochu celta, que lleva yá unos años atoñando en Galicia y Portugal, territorios pelos qu'espardía los sos dominios y pelos qu'agora vuelve a criase'l gochu "d'oreya llarga" que ta ayudando reactivar una economía agroganadera xenerando un productu de altísimu valor añadíu y de calidá. Asina ye qu'alredor d'ello funcionen yá pequeñes industries de tresformación y ellaboración d'embutíu al tiempu que l'alministración subvenciona l'actividá con campañes de promoción y infraestructures. Asturies quier garrar tamién esi carru.