Nacho Vegas pieslla xira en Xixón

El cantautor asturianu Nacho Vegas va actuar esti sábadu día 31 nel teatru Xovellanos de Xixón presentándo-y al públicu asturianu los sos dos últimos discos.

Esti músicu asturianu tuvo mui activu nel 2.003; un bon númberu d'actuaciones y dos discos nel mesmu añu son la prueba d'ello. Precisamente estos dos discos, "Canciones desde Palacio" (payares 2003) y "Cajas de música difíciles de parar" (febreru 2003) son los que va presentar la nueche del sábadu en Xixón, acompañáu pola so banda que lleva'l nome de "Las esferas invisibles".

Los directos de Nacho Vegas son un espectáculu trabayáu sobre too no que cinca a los propios cantares, a la fin los verdaderos protagonistes de los conciertos. Les igües nos cantares cambien d'unos conciertos a otros, y pa esti sábadu ye d'esperar dalguna novedá interesante. Pa dar cuenta d'estes posibles novedaes, esti conciertu va grabáse pa una futura edición del mesmu. Pa llevar alantre la grabación cuéntase colos técnicos de soníu Paco Loco, que tamién va tocar nel conciertu, y Xel Pereda, técnicu de soníu de Nacho Vegas na so xira, y más conocíu por ser guitarrista de "Llan de Cubel". La grabación de les imáxenes del conciertu va ser trabayu del habitual collaborador del cantautor, Ramón Lluis Bande.