Nacho Fonseca fai una escoyeta de 'Canciones pa la Xentiquina' pal títulu nuevu de La Fabriquina

‘Canciones pa la Xentiquina. Una selección sentimental de Nacho Fonseca’ ye’l títulu nuevu de la coleición de música infantil n’asturianu de La Fabriquina qu’abrió ‘Kikirikikí’ d’Alicia Álvarez. Ye un llibru-CD con 10 temes que s’acompañen de les lletres y tienres ilustraciones de Bitxo.

Nacho Fonseca, creador de los famosos coros d’escolinos Seliquín y Xentiquina y autor de la banda sonora de la infancia de delles xeneraciones n’Asturies, escoyó esta decena de temes a partir de los sos recuerdos y emociones, “tantos como, de xuru, espertaron nes neñes y nos neños que crecieron imaxinando l’asientu tocín de la moto de Pachín, esi cañicón que raspiaba’l cielu o aquel vieyu sultán qu’iguaba los conflictos xugando al parchís”, apunten dende la editorial. “Canciones escrites y interpretaes n’asturianu, enllenes de lluz y humor, y grabaes a lo llargo de tres décades en siete esitosos discos, lo qu’ayudó de manera fundamental a normalizar l’usu del asturianu y a promover la so tresmisión”, rescamplen.

Completa esti proyeutu editorial el trabayu de Bitxo, ilustradora “que s’encarga d’aportar, dende’l so propiu universu poéticu, color, tenrura y imaxe a les lletres de les canciones que se pueden escuchar nel CD incluyíu nel interior pa que, asina, el llegáu musical de Fonseca siga pasando de xeneración en xeneración”. El discu-llibru, que quier ser un homenaxe al llegáu musical del maestru sierense, va presentase’l sábadu 25 de mayu al meudía nel patiu del Centru de Cultura Antiguu Institutu.