Nacho Fonseca escribe la obra ‘El rei y otres frebes’ pa la celebración del Alcuentru Medieval de L’Entregu

El 19 de xunetu va tener llugar en L’Entregu la representación de ‘El rei y otres frebes’. Nacho Fonseca ye l’autor d’esta obra teatral que va sirvir d’apertura del VIII Alcuentru Medieval, dientro de les fiestes de La Llaguna.

L’escritor, académicu y creador de Seliquín y Xentiquina, encargóse esti añu d’ellaborar el guión teatral de temática medieval en llingua asturiana que s’interpreta nel actu de coronación del Rei Aurelio, papel qu’esti añu va correr a cargu de Alfonso Zapico, ilustrador y escritor de Blimea. Ésti ye ún de los eventos que xeneren más espectación dientro de les actividaes entamaes pola Sociedá de Fiestes y Cultura L’Entregu pa estes xornaes festives, de les que se conocerán más detalles en feches próximes.

Otra manera, el Conceyu de Samartín del Rei Aurelio ta acabante de solicitar al Gobiernu d’Asturies una distinción pal Cuartetu Torner pola “so dilatada trayeutoria artística”, al sumar 30 años “difundiendo la música y la cultura asturiana”, y “la calidá humana de los sos componentes”. Amás, dende’l Consistoriu animen a los coleutivos del conceyu a sumase a esta propuesta. Luis Estrada, Roberto González, Arsenio Fernández-Nespral y Emilio García, los cantantes que conformen el Cuartetu Torner, recibieron ayeri la insinia d’oru del coleutivu Amigos de Parres nun actu nel que tamién participó la Coral Cima. Nun ye l’única muestra de ciñu hacia estos artistes que ta prevista, yá que la Orquesta Langreana de Plectro trabaya nun homenaxe a estos intépretes de canción asturiana, iniciativa que tien el sofitu de los ayuntamientos de Llangréu y Samartín.