Na Zona presentó'l so discu

Na mañana del xueves presentóse a los medios, nos locales de la SGAE d'Uviéu, el primer discu del grupu asturianu Na Zona.

Na Zona defínense a si mesmos primero de nada como una mezcolanza de músicos y inquietues bien diferentes, que garren el folk como base o sida pa tocar xuntos. Asina somos quién a albidrar sones de jazz, rock o hasta de música clásica nel folk que defende Na Zona. Asina sobre'l grupu y la so rellación col folk asturianu podemos dicir, ensin mieu d'equivocanos, que tienen un soníu daqué diferente, que quier rescamplar ente los estilos hasta agora mayoritarios na escena folk asturiana. Anque esta seya'l so primer discu, y tovía seyan unos desconocíos pa la mayoría de los aficionaos al folk asturianu, el grupu lleva dalgo de tiempu tocando, y por poner un casu, yá fueron finalistes de concursu xuvenil européu de música tradicional Eurofolk 2004 de Granada.

El discu de Na Zona, que lleva'l mesmu nome que'l grupu, yá ta na cai dende va unes selmanes, anque esperaren a hasta hasta esti xueves pa presentalu. Pa poder conocer lo que nos propón esti grupu, amás de mercar el discu, tamién podemos velos en directo'l próximu 24 de setiembre a les 23:00 hores nel café Masavéu d'Uviéu.