N’Ast presenta un escritu ante la Xunta Eleutoral pa que se distribuyan papeletes en llingua asturiana

L’Asociación Cultural N’Ast presentó un escritu ante la Xunta Eleutoral pa qu’haya papeletes n’asturianu nos colexos eleutorales y que los ciudadanos puedan exercer el derechu a votar na so llingua. Nes estatales del 20-P nun s’ufrieron papeletes pa ello.

La intención d’esti coleutivu ye que “se fine d’una vegada cola contradictoria situación agora mesmo esistente na que se validen les papeletes en llingua asturiana al empar que s’impide la so pre­sencia nos colexos eleutorales, nuna incaltenible práutica de ‘apartheid’ llingüísticu col que se vulneren los llexítimos drechos y llibertaes de los asturianos en materia llingüística”. Hai que recordar que nes eleiciones estatales de payares la Xunta Eleutoral bloquió les papeletes d’Andecha Astur por tar n’asturianu, anque finalmente tuvo que rectificar y permitir l’usu d’éstes y les de cualquier otru partíu si tuvieren en llingua asturiana. Sicasí, al mesmu tiempu negábase a ufriles nos colexos, obligando a los asturianos a tener que votar con una papeleta en castellanu.
 
Nel escritu presentáu la selmana pasada por N’Ast, solicitóse formalmente que se “facilite a tolos asturianos l’exercer el so drechu a votar n’asturianu, emitiendo les papeletes eleutorales de toles candidatures presentaes a estes prósimes eleiciones del 25-M en llingua asturiana y distribuyéndoles con normalidá nos colexos eleutorales; dando acabu d’una vegada a la situación predemocrática que carecemos anguaño”.