N’Alcordanza va convertir Xixón “nun escenariu” esta fin de selmana pa recordar a Ígor y Carlos

“La filosofía sigue siendo la mesma que siempre: rendir tributu a estes dos figures fundamentales de la música asturiana y tamién reivindicar la música asturiana”, esplicó Boni Pérez, cara visible de la organización del eventu xunto con Rubén Ardura y Ruma Barbero. Tres prebar dellos formatos nos siete años anteriores, la bona esperiencia del añu pasáu, consistente en repartir a lo llargo de dos xornaes los conciertos per llocales de Xixón, va repetise nesta edición. “Convertimos la ciudá nun escenariu”, añadió Pérez, al mesmu tiempu que “implicamos y premiamos a estos establecimientos que programen música en direuto tol añu”.

 

Como novedá con respeuto a ediciones anteriores, los organizadores decidieron sumar al mundu gráficu, nel que tanto Ígor Medio como Carlos Redondo taben involucraos, al recuerdu d’estos dos artistes. Asina, solicitaron la collaboración de xente cercano pa la ellaboración de postales que tán difundiéndose peles redes sociales, a razón d’una per día. “Esti primer añu decidimos contar con persones que tuvieren rellación tanto con ún como con otru”, esplicó Barbero, conformando una llista nel que se pueden atopar ilustradores, dibuxantes, fotógrafos o pintores, de dientro y fuera d’Asturies y con mayor o menor nome. “Lo que-y pidimos a la xente ye qu’intentaren tresmitir nuna imaxe qué ye pa ellos la música o la profesión de facer música”, apuntó Ardura, que destacó les bones y diferentes propuestes que se pueden ver na estaya ‘Les postales’ de la web de N’Alcordanza.

 

Esta idea enllaza col manifiestu fechu públicu l’añu pasáu y lleíu en cada actuación de la edición del festival del 2013, nel que la música asturiana recuerda que l’accidente de tráficu que sufrieron Ígor y Carlos la Nueche de San Xuan del 2006 de camín a Catalunya foi un accidente llaboral. Tamién tresllada a les instituciones públiques “que la música n’Asturies pue ser un valor cultural, una seña d’indentidá, pero tamién una industria cultural”, y manda un mensaxe a entidaes que xestionen derechos d’autor pa salvar problemátiques que surden de la so actividá y al públicu “pa que reconoza y valore lo que ye facer música, lo complicao que pue ser vivir d’ella, y pa que sía consciente cuando vea una banda enrriba l’escenariu del munchu trabayu y sufrimientu qu’hai detrás”.

 

Bueno y Miki y Los Doras, novedaes últimes

 

N’Alcordanza 2014 va principiar el vienres 27 cola actuación de Buensuceso nel Toma 3 (20 hores), pa depués pasar l’espectáculu al Acapulco (22 hores) con un conciertu nel que va tomar parte Medication/2, Los Sangrientos, UHP y Kactus Jack. Yá na mañana del sábadu, Ribera va abrir el programa nel Alambique (13 hores), pa depués dar pasu a la tonada na sidrería Canteli (14.30 hores) con Marisa y Fernando Valle Roso, acompañaos a la gaita por Pablo Carrera. La música na llingua del país va continuar na terraza de La Vida Alegre (16 hores) con un tríu formáu por Silvia Quedada, Alfredo González y Rubén Bada, y Felpeyu, y, darréu, nel Trisquel (18 hores) con Corquiéu y Rebelguinos. El Patio de la Favorita va garrar el relevu musical a les 20 hores cola presencia d'Hnos. Fratelli, La Villana y Bueno, pa depués centrar l’atención el Sweet 01 (22 hores) con Black Horde y Herr Manos. Un conciertu de Blues & Decker va zarrar el festival nel Savoy nuevu a partir de la medianueche, eventu nel que tamién taben previstos Los Paramétricos y Pilgrim Rose. Hasta última hora nun va conocese la presencia d’estes dos bandes, anque la organización ta acabante de confirmar l’actuación del tríu de surf Miki y Los Doras como sustitutu.

 

Na semeya, Ardura, Barbero y Pérez.