Muyeres en xira

Esti fin de selmana vamos tener la oportunidá de poder ver ún de los meyores espectáculos de música tradicional. Muyeres, esti colectivu que tien tres de so un importante trabayu d'investigación y divulgación, ta acabante de sacar el so caberu discu, "Pasamentu", y van presentalu en dos cites, primero güei mesmo, vienres 25 en Mieres a les 20:30 nel salón d'actos de la Caxa d'Aforros, dientro d'unes xornaes sobre la canción asturiana. Si nun pues dir veles a Mieres, ties la oportunidá de facelo en Xixón el sábadu nel teatru Xovellanos a les 20:00 hores.Les actuaciones nun queden namás n'interpretar les distintes pieces, ya nun se trata solo de que l'espectador escuche la música, si non de qu'entienda tamién el porqué d'esa música, ye dicir, deprender d'una forma prestosa los distintos matices de la música tradicional asturiana: entender cuando y como se tocaben determinaes pieces y deprender a enxertales nos distintos ciclos rituales a los que correspuende cada pieza. Anque les mas de les pieces son vocales con acompañamientu de percusión con panderos, payel.la etc, tamién estes moces van tar arropaes por instrumentistes como David Varela al cordión diatónicu, J.Indalecio Santos al clarinete, Diego y Pedro Pangua a la gaita y el tambor, y otres participaciones que completen un interesante conciertu.