Música sacro n'asturianu

Esti sábadu 12 de marzu, col encontu del Coleutivu Manuel Fernández de Castro, la "Coral Asturiana Enrique Montes", presentó na Parroquia de La Merced d'Uviéu la versión musicada de los Salmos en llingua asturiana.


La xénesis d'esta obra de música sacro n'asturianu vien de vieyo. Ello foi que yá nel añu 1998 la Sociedá Bíblica asoleyó la torna asturiana de los Evanxelios y los Salmos na obra Nuevu Testamentu y Salmos. Esti fechu permitió a Enrique Montes, director de la Coral, entamar col trabayu de musicación de los 150 salmos; un llabor compositivu que desarrolló a lo llargo d'estos años y qu'esti mes recibió yá la so puesta de llargo, presentándose por primer vegada al públicu en Xixón el pasáu día 5 na Parroquia de San Pedro y agora n'Uviéu, onde la Coral "Enrique Montes" participó na misa n'asturianu que tolos sábados a les 21:00 h. tien llugar na Parroquia de la Merced. L'actu musical consistió na interpretación d'estremaos cantos lliturxicos pa ufiertar darréu un pequeñu recital con dellos de los salmos más representativos.