Música en directo y fecha n’Asturies: asina ye 'Sonadía', el nuevu programa musical de TPA

Esti domingu, 3 de marzu, estrénase 'Sonadía', el programa nuevu de música de la cadena asturiana, una producción de Zebrastur que quier ser una amuesa de la bayura y variedá de la música fecha n’Asturies.

¿Por qué 'Sonadía' ye'l nome del programa?

Cuando daqué tien sonadía ye que tien repercusión, que tien renome, que suena…, y con esta mira les xixones Mar y Alicia Álvarez van atopase cada selmana con distintes formaciones o artistes que merecen ser escuchaes, sonar y ser conocíes.

¿Quién son les presentadores de 'Sonadía'?

Una de les singularidades de 'Sonadía' ye que consiste nuna charla ente músicos. Les presentadores, Mar y Alicia Álvarez, Pauline en la Playa, son unes referentes de las escena independiente y cuenten con una llarga trayectoria profesional qu'entamó hai treinta años con Undershakers, una de les primeres bandas íntegramente femenines del Estáu y ún de los grupos más importantes del Xixón Sound.

Dende 1999, yá como Pauline en la Playa, lleven editaos 7 discos, al qu'esta primavera van sumar un octavu. Amás de Pauline, Mar lidera Petit Pop, ye compositora de teatru y televisión, directora musical de dellos proyectos pa la Fundación Princesa de Asturias y directora de la Escuela de Música Sonidopolis.

Alicia, pel so llau, ye periodista (na radio tuvo al frente de 'La Ventana de Asturias' y de 'Hoy por Hoy Gijón' na Cadena SER, y, en prensa escrita, foi articulista selmanal del diariu asturiano 'La Nueva España'. Ye tamién escritora con dellos títulos publicados, l'últimu d'ellos 'ASTURIANES', y dende 2015 dirixe'l sellu editorial La Fabriquina, col que impulsó la esitosa colección 'Bestiariu' o los llibru-discos 'Pulgarina' y 'Kikirikikí', qu'interpreta davezu en directo.  

¿Cuál ye'l plantegamientu del programa?

Cada capítulu de 'Sonadía' plantégase como un viaxe sonoru per diferentes estilos musicales, non sólo a traviés de les conversaciones colos diferentes artistes, sinón tamién a traviés de la so música, qu'interpreten en directo en llocalizaciones singulares. Tanto l'acabáu estéticu como la calidá del soníu son elementos mui cuidaos nesta producción que da cuenta de la gran bayura musical fecha n’Asturies.

¿Qué tipu d'artistes van apaecer en 'Sonadía'?

En cada capitulu del programa conviven dellos estilos musicales (pop, folk, jazz, electrónica, música clásica, rock, urban, hip-hop…) y tamién dellos grados de veteranía. La intención ye que toos dellos, los que empiecen y los que yá cuenten con una carrera afitada, tengan el so espaciu nel programa.

¿En qué llocalizaciones va grabase'l programa?

'Sonadía' nun ye un programa de plató. Los entornos pa les actuaciones van variando según el programa y los artistes que participen. La biblioteca del Edificiu Históricu de la Universidá d'Uviéu, la sala de Pintures de la Llaboral, una galería o les salas de conciertos conviértense nel escenariu de las diferentes actuaciones.

¿En qué llingua ye'l programa?

'Sonadía' va combinar l'asturianu y el castellanu. Les llocuciones van dando pasu a cada historia n’asturianu y nes entrevistes el castellanu ye principalmente la llingua vehicular.

¿Quién apaez nel primer capítulu?

Nel programa del 3 de marzu Alicia y Mar van falar con Abéu (folk), Igor Paskual (rock), Arma X (hip-hop), Cesar LaTorre Trio (jazz), Trio Orbón (música de cámara) y Milana Bonita (indie-rock).

¿Cuándo s'emite?

'Sonadía' emítese en TPA los domingos a les 21.45 hores, depués de la segunda edición de 'El tiempo'.

Na semeya, un momentu de la grabación del programa.