Muncho folk n'Ascensión

La feria ganadera de l'Ascensión convirtióse, por obra
del Conceyu d'Uviéu, en too un espectáculu onde conviven una mezclienda de mercáu de ganáu, esposiciones, actividaes de tou
tipu y una bona riestra de conciertos



Diba ser casi imposible resumir nuna noticia toles propuestes d'esta
Feria de l'Ascensión 2005 entamada pol Conceyu d'Uviéu. Dende'l
mercáu de ganáu nel recintu del conceyu vecín de Llanera hasta les cais
d'Uviéu, la cultura asturiana va tar presente per munchos requexos del
conceyu uvieín. Xunta les esposiciones y
muestres de productos asturianos de siempre de la feria de l'Ascensión o otres cares menos
conocíes de la cultura asturiana como la mitoloxía o los deportes
asturianos, la música va tener tamién el so
llugar. D'eso van encargase los festivales de tonada, el festival de bandes de
gaites y grupos folclóricos, que va recorrer les cais d'Uviéu'l
sábadu a les doce la mañana, o l'actuación de la bandina
Sones Vieyos nel Mercáu Astur el mesmu sábadu a les 20:30 hores.




Con too y con ello, lo que más llama l'atención nel
aspectu musical d'esta feria son los conciertos programaos pa les nueches del
vienres, sábadu y domingu na plataforma de la Renfe. El vienres
día seis va tocar a partir de les 21:00 hores el gaiteru Bras Rodrigo,
que cola so banda va tocar los temes del so discu Xermandía, acabante de
salir al mercáu, colo que músicu y discu tienen una bona preba de
valir énte públicu. Completa la nueche l'actuación de
N'Arba, que, paez que d'esta sí, yá tán preparando'l so
esperadísimu discu.



El sábadu, a la mesma hora y nel mesmu sitiu, tenemos el nome
más internacional d'ente los grupos que van tocar nestos conciertos.
Ye'l gaiteru gallegu Carlos
Núñez, que vuelve a tocar n'Asturies, sitiu que ya
visitó otres vegaes dende que consiguió l'éxitu
comercial col so discu A irmandade das estrelas. Xunta'l gaiteru vigués
va tar la formación ayerana Tarañu, grupu qu'asoleyó esti
añu'l so primer discu
Al
xeitu de nenyuri, y qu'amás ta acabante d'estrenar la so
páxina web qu'animamos a
visitar.



El menú folk d'esta feria pieslla'l domingu coles
actuaciones a partir de les 21:00 hores de los grupos asturianos Skanda y
Felpeyu, de sobra conocíos, y a los que-yos espera una temporada de
branu enllena de conciertos. Pa conocer con más detalle la llarga llista de
propuestes de la feria de L'Ascensión convidamos a los nuesos llectores
a dir a la páxina web del Conceyu d'Uviéu onde tienen a la so
disposición
tola
programación.