Multa de 90 euros a Arturu Bermeyu por trancase nel despachu de Riopedre

Arturu Bermeyu, el padre de la escolina del IES "Monte Naranco" que l'añu pasáu fuere noticia porque nel centru nun quixeron poné-y clas d'asturianu, ye noticia un añu dempués.

Un cursu dempués de qu'entamare l'asuntu, la situación de Catuxa Bermeyu, según esplica'l padre, foi a peor. En nun teniendo opción a dar asturianu, l'institutu mandó a Catuxa a un grupu de francés al que la neña nun se presentó en tol cursu, suspendiendo l'asignatura. Agora Catuxa, que ta repitiendo cursu, tien qu'asistir amás por decisión del centru a un grupu d'educación especial con otros alumnos con necesidaes educatives especiales.

Énte esta situación, Arturu Bermeyu, que lleva ún añu llargu pidiendo una entrevista o, a lo menos, una rempuesta del conseyeru, decidió dar un golpe d'efectu y ayeri presentóse en despachu de José Luis Iglesias Riopedre dimpuestu a nun salir d'allá hasta que s'atendiere la so petición, pero la única rempuesta foi l'apaición a les poques hores d'efectivos del Policía que lu sacaron del despachu y lu llevaron a comisaría, d'au salió cuatro hores dempués con una citación pa xuiciu rápidu esta mesma mañana baxo los cargos de resistencia a l'autoridá y desacatu.

Na vista celebrada esta mañana n'Uviéu, la defensa d'Arturu Bermeyu apautó una salida negociada que dexa al padre de Catuxa con una multa de 90 euros, que, en casu de nun abonase, tresmutaríase por siete díes de cárcele. Puestos en contactu con Arturu Bermeyu n'acabando'l xuiciu ésti espresó a Asturies.com la so sorpresa pol fechu de que lu llevaren a xuiciu a elli, que taba reclamando "un derechu constitucional" y non al titular d'Educación, que, según Arturu Bermeyu, ye l'únicu que ta incumpliendo la llei.

Arturu Bermeyu espresó que lleva un añu esperando por una rempuesta por escrito de la conseyería na que s'esplique por qué la so fía nun tien clase d'asturianu. Bermeyu tuvo palabres mui crítiques pa colos sindicatos d'enseñanza, y esplicó que tien puestu un recursu dende va dos selmanes contra l'alcuerdu ente sindicatos y conseyería pol que se precisa un mínimu d'ocho alumnos pa facer grupu d'asturianu. En palabres d'Arturu Bermeyu esti alcuerdu ye illegal porque'l derechu a l'enseñu del asturianu "ye individual y non colectivu"