Muga va llevar les pieces de ‘Chants de femmes des Asturies’ a un discu

|
Muga

Les pieces que conformen l’espectáculu ‘Chants de femmes des Asturies’ de Muga, que ta percorriendo dellos llugares y festivales de Francia y que se vio en Xixón nel Arcu Atlánticu, van protagonizar un discu. El tríu asturbretón entama una cuestación popular na rede p’ayudar a financialu, cola intención d'asoleyalu en primavera.

Clara Diez pon voz al proyeutu que pretende dar una dimensión artística nueva al repertoriu cantáu n’Asturies por muyeres, alloñándose del “dogma de la tradición” y centrándose nes perceiciones personales de cada músicu. Martin Chapron y Thomas Felder, dos artistes bretones qu’intrepreten les guitarres y el violín, de manera respeutiva, acompañen en Muga a l’asturiana, que tamién toca la pandereta y el pandeiru.

El grupu, afincáu n’An Oriant, va grabar el discu n’ochobre na tamién población bretona de Kervignag col propiu Chapron como téunicu de captación. Lorena Rodríguez Marcos, a la voz y la percusión, y Romain Boudoin, a la gaita rabil, van collaborar nesti álbum que va salir en primavera baxo’l sellu discrográficu gascón Pagans, que trabaya con grupos qu'usen la música popular del so territoriu como material brutu pa esplorar les músiques actuales.

El llibretu del mesmu va incorporar amás los testos de Pablo Texón fechos pal espectáculu en direuto. Otra manera, mientres estos meses, la banda va xirar xunto colos grupos Arn y Ludjer nuna coproducción de BWS (Bretaña World Sounds) en festivales como NoBorder (Brest), Transmusicales (Resnn), Pan Pipers (París) o BIS (Naunnt).

Campaña n'Internet

Cola intención d’ayudar a financiar el discu, Muga comenzó güei una campaña de cuestación popular na rede al traviés de la plataforma Verkami, que se va allargar 40 díes. Con ella pretenden algamar 5.000 euros colos que facer realidá un trabayu que los participantes van recibir a partir del 3 d’abril, fecha estimada d’asoleyamientu de ‘Chants de femmes des Asturies’.

Pa ello, ufre delles opciones con recompenses que van dende los 8 euros –descarga dixital del álbum– hasta los 600, con conciertu del tríu incluyíu, ente otros regalos. Pentemedies, otres opciones con ilustraciones, una pandereta personalizada o inclusive una clase de dos hores con dalgún de los integrantes de Muga.

Semeya obra de Cédric Raylet

Contador Estadistiques