Muerre José Luis Iglesias Álvarez, dirixente históricu d’USO

El dirixente históricu de la Unión Sindical Obrera (USO), José Luis Iglesias Álvarez, morrió esti llunes en Xixón na sede del sindicatu a los 72 años d’edá. Anguaño yera’l responsable de les rellaciones institucionales d'USO.

Iglesias Álvarez (Xixón, 1939) foi secretariu xeneral d'USO en Xixón dende’l 1991 al 2005. N'estudiando na Fundación Revillagigedo, entamó la so vida llaboral a los 17 años trabayando como rectificador en Talleres Llama. Tres integrase en 1962 na Federación Sindical de Trabayadores, entró en contactu con líderes como Severino Arias, Paco Corte o Eugenio Royo, col que fundó la Unión Sindical Obrera (USO). Siempre dientro d’esti sindicatu, ocupó cargos de responsabilidá na direición nacional y na estaya metalúrxica. Nel 1983, al celebrase'l tercer congresu, entró a formar parte de la Comisión Executiva d'Asturies y cuatro años depués asumió la Secretaría d'Aición Profesional.

En marzu del 1991, con ocasión del primer congresu llocal d'USO de Xixón, resultó escoyíu secretariu xeneral, responsabilidá que revalidó nos trés congresos siguientes y qu'abandonó en xunu del 2005, cuando pasó a ocupar, nel octavu congresu nacional, la Secretaría de Relaciones Institucionales d'USO d'Asturies. Nel 2008, Iglesias Álvarez recibió la medaya de plata de Xixón "col fin de reconocer de forma simbólica’l valor éticu del comportamientu y la trayeutoria vital d'esti veteranu sindicalista y lluchador social, y pa espresar tamién con ello'l respetu y el cariñu qu'inspira na nuesa ciudá".

La izquierda asturiana tamién dio muestres d’esi cariñu a lo llargo del día de güei. Asina, los secretarios xenerales d’UXT  Asturies, Justo Rodríguez Braga, y de CC OO Asturies, Antonio Pino, recordaron a Iglesias Álvarez como un gran lluchador pola llibertá y los derechos de los trabayadores. Mentes, el grupu municipal d’IX-LV nel Conceyu de Xixón manifestó la so “más fonda tristeza y solidaridá cola so familia y los sos compañeros" y recordó al dirixente históricu d'USO como "un home fondamente solidariu y comprometíu colos valores de la izquierda, que dexa una buelga imborrable en tolos que lu conocíen". Jesús Iglesias, coordinador xeneral d’IX Asturies, tamién robló un comunicáu nel mesmu sentíu que los sos compañeros xixoneses.