Muerre Hugo Chávez tres añu y mediu de llucha contra’l cáncer

A les 21.55 hores –16.25, en Caraques– finó’l presidente de Venezuela y impulsor de la Revolución Bolivariana, Hugo Chávez, tres añu y mediu de llucha contra’l cáncer. El vicepresidente Maduro llama a la xunidá del pueblu venezolanu.

Chávez nun pudo superar la cuarta operación quirúrxica, fecha’l 11 d’avientu en La Habana, y morrió nel Hospital Militar de Caraques esta nueche, hora asturiana, tres empeorar el so estáu a lo llargo del día de güei. Un tumor canceríxenu nel abdome provocó la so primer intervención en xunu del 2011, del que paecía que taba recuperáu, pero, tres una recayida, nin les operaciones posteriores nin el tratamientu de quimioterapia en Cuba pudieron ayudar a Chávez a vencer esta batalla. El de Sabaneta dexa’l cargu de presidente a los 58 años, 14 d’ellos na presidencia.

Nicolás Maduro dio l’anuncia de la muerte del líder de la Revolución Bolivariana nel antepar del Hospital Militar y llamó a la xunidá del pueblu venezolanu. Tamién anunció un despliegue importante de les fuercies armaes per tol país p’asegurar la paz. Según manda la Constitución, el presidente del Parllamentu, Diosdado Cabello, llevará les riendes de Venezuela hasta la celebración d’eleiciones nueves. Con casi toda seguridá, Maduro será l’encargáu de dar continuidá a les polítiques socialistes de Chávez.

Autoría de la semeya: premier.gov.ru