Mozos asturianos d'ente 21 y 31 años opten a 16 beques de cooperación n'América y África

|
Mozos asturianos d'ente 21 y 31 años opten a 16 beques de cooperación n'América y África

El plazu pa presentar solicitúes a estancies d'ente 2 y 3 meses remata'l día 29.

La Conseyería de Presidencia y Participación Ciudadana, al traviés de la Axencia Asturiana de Cooperación, convoca la tercer edición del programa 'Mocedá Asturiano Cooperante', qu'anguaño ufierta 16 beques pa la participación en proyutos de cooperación que distintes organizaciones desenvuelven, col sofitu económicu del Gobiernu, en 9 países d'África y América Llatina. Estudiantes, titulaos y llicenciaos universitarios d'ente 21 y 31 años pueden optar a una de las beques pa formarse nel ámbitu del voluntariáu internacional.

La subvención cubre los gastos del viaxe d'ida y vuelta, la estancia, l'agospiamientu, el seguru de viaxe y les vacunaciones, al igual que la formación previa y obligatoria que se va impartir n'Asturies. La convocatoria espublizóse ayeri nel Boletín Oficial del Principáu (BOPA) y los aspirantes tienen de plazu hasta'l 29 d'abril pa presentar les sos solicitúes.

La convocatoria de 2019 ufierta places en Bolivia (Ayuda en Acción), Colombia (Pueblo y Dignidad), Guatemala (Asociación para la Cooperación Seronda), Nicaragua (Asociación Asturiana Gaspar García Laviana y Cooperación Social Asturias para la Ayuda y el Desarrollo), Perú (Cooperación Social Asturias para la Ayuda y el Desarrollo), República Democrática del Congu (El Pájaro Azul), Tanzania (Asociación Matumaini), Senegal (Amigos de ThionckEssyl de Asturias) y Sierra Lleona (Médicos del Mundo). Los proyeutos de cooperación tán empobinaos a la meyora y fortalecimientu de les infraestructures educatives, el empoderamientu de muyeres, l'insertamientu de persones en riesgu d'esclusión, la soberanía alimentaria de coleutividaes indíxenes y la cobertura de necesidaes básiques de menores y adolescentes.

Poro, los perfiles profesionales solicitaos son titulaos o estudiantes de Medicina, Enfermería, Maxisteriu, Filoloxía, Trabayu y Integración Social, Ciencies Ambientales, Inxeniería Agrícola y Forestal, Psicoloxía, Pedagoxía, Periodismu, Derechu, Economía, Direición d'Empreses y Inxeniería Téunica y Superior.

Na semeya, un momentu de la presentación de la edición del 2019 del programa.

Contador Estadistiques