Morrió Mánfer de la Llera

L'escritor Manuel d'Andrés Fernández, más conocíu pol alcuñu lliterariu de Manfer de La Llera, morrió ayeri a los 87 años d'edá. El funeral civil pol escritor, nel que va facese un actu lliterariu y musical, va tener llugar mañana xueves 7 d'abril en Tanatoriu de Cabueñes-Xixón a les 18:00h.

Natural de Les Cuestes de Ciañu, en conceyu Llangréu, Mánfer de la Llera naciere nel añu 1918, entamare a dase a conocer como escritor de monólogos humorísticos y poesía costumista, a la manera del tipu de lliteratura que s'estilaba nos años de la postguerra, cuando Manfer de la Llera espubliza los sos primeros versos. Más tarde interesárase pol tema de la mina, sobre'l que traten la mayoría de los sos llibros; nellos xunta la denuncia social, la reivindicación de la llingua y la quexa esistencialista en formes poemátiques que davezu s'alleguen a la prosa. Bona parte de los sos escritos apaecieren en prensa periódica asturiana y cartafueyos de fiestes del so Llangréu natal, teniendo dende la vuelta de la democracia una mayor presencia editorial y permaneciendo como escritor n'activu hasta prácticamente güei.

Directivu de Conceyu Bable na so última etapa y miembru de l'Academia de la Llingua Asturiana, Mánfer yera ún de los históricos defensores del asturianu y yera tamién padre del tamién escritor n'asturianu Vital d'Andrés y del filólogu y actual director de la Oficina de Política Llingüística d'Asturies Ramón d'Andrés.

La so primer obra Cuentos en verso asturiano apaeciere nel añu 1953, y a ella habríen siguir Cielo bajo tierra nel 1982, Garrapiellu lliterariu asturianu nel 1983 o Cabalgando sol tiempu nel añu 1990. Xunta col so fíu Ramón d'Andrés, Manfer de la Llera espublizó nel añu 1997 una interesante obra de consulta como ye'l Vocabulariu asturianu de la mina. La so apaición n'antoloxía El cuentu asturianu tres la guerra d'Antón García xunta los más destacaos narradores asturianos de posguerra vien a afitar el protagonismu de Mánfer de la Llera ente los autores de la so xeneración. Les sos últimes obres foron Coses vivíes (1999) llibru d'alcordanza onde recueye vivencies de los duros tiempos d'enantes y dempués de la guerra. Cróniques y suaños (2004), obra que presenta una esbilla de los sos testos periodísticos, ye'l llibru que pieslla definitivamente la so carrera.

L'equipu d'Asturies.com quier facer públicu'l so pésame pola perda.

Ver equí la entrevista que-yos ficiere Inaciu Galán a Mánfer de la Llera y Ramón d'Andrés el pasáu mes d'ochobre.