Morcín celebra una fin del selmana dedicada al gochu-asturcelta

Santolaya va acoyer esti sábadu’l IV Concursu-Esposición Nacional del Gochu Asturcelta, nel que ta previstu’l repartu de más 100 quilos de picadillu d’esta raza autóctona. L’actividá va completase’l domingu cola I Folixa del Gochín a la Estaca.
 
Al final van ser 167 los animales que participen nel concursu-esposición d’esti añu que reúne a tolos ganaderos que críen esta raza del país y a munchos visitantes atraídos pola belleza d’esti animal y pola calidá alta de la so carne. Asina, amás de poder ver a los meyores exemplares, tamién van poder mercar productos derivaos del gochu asturcelta –ente los que destaquen los primeros xamones d'esta raza– nos stands que Productos Agroalimentarios Gancedo,de Tinéu, y la carnicería El Rosal, de Grau, van instalar nel llugar.
 
La cita, entamada pola Asociación de Criadores de Gochu Astucelta (ACGA), en collaboración col Conceyu de Morcín y l’Asociación de Muyeres So la Malena, y col sofitu de la Conseyería d’Agroganadería y Recursos Autóctonos, va principiar a les 9.30 hores colos primeros esámenes del xuez Félix Goyache, responsable del programa de meyora xenética del Serida, a los animales presentaos a concursu en cualisquier de les modalidaes: meyor gocha, meyor berrón, meyor llabasca d’hasta 8 meses, meyor llabascu d’hasta 8 meses, meyor gocha con gochinos y meyor rebañu. El primer premiu en cada modalidá va llevase 150 euros, mentes que’l segundu va recibir 90 y, el terceru, 60. La entrega de gallardones ta prevista pa les 13.30 hores.
 
Ente les 11 y les 13.30 hores va tener llugar el repartu de baldre de más de 100 quilos de picadillu de gochu asturcelta con tortos, ellaboráu poles muyeres de So la Malena, una manera perfeuta de prebar la calidá dela carne d’esti animal. Amás tamién va celebrase’l I Concursu de Picadillu de Gochu Asturcelta, nel que’l xuráu formáu por Juanjo Cima, propietariu del bar Vinoteo, d’Uviéu; David Fernández-Prada, periodista y xerente de Gustatio; Jorge Ignacio Sánchez, direutor de Gastroastur; Miguel Llano, periodista y direutor del suplementu ‘Yantar’ del diariu El Comercio; y Luis Serrano, periodista del programa ‘Conexión Asturias’, de TPA, van decidir cuál ye la meyor propuesta de les presentaes polos ganaderos participantes nel certame.
 
Aprovechando la celebración de les xornaes, ACGA tamién va entregar los sos gallardones anuales a aquelles persones o entidaes qu’amosaron, d’una manera desinteresada, el so sofitu pa la recuperación de la raza de cerdu autóctona. Nesta ocasión, los premiaos pol coleutivu son Ramón Celorio, restaurador asturiano y responsable gastronómicu del Hotel Pelayo, Rectoral Taramundi y el tren Transcantábricu, ente otros; y el programa ‘Conexión Asturias’.
 
Mentes, el domingu, l’actividá rellacionada con esti animal nun va parar, puesto que va celebrase la I Folixa del Gochín a la Estaca nel mesmu recintu ferial de Morcín. Nella ta previsto la participación d’unes 500 persones y la preparación de 18 gochinos d’unos 20 quilos. La ración tien un preciu de 10 euros y, pa disfrutala, ye necesario reservar con antelación per teléfonu al 985.783.359 (bar El Cruce).