Montes Estrada reconoz qu’IX nun tien fuerza pa llevar alantre sola la oficialidá

Nunes declaraciones que reproduz güei'l periódicu de Xixón "El Comercio" el dirixente d'Izquierda Xunida de Xixón Jesús Montes Estrada afitó la posición de la so coalición política al favor del reconocimientu de la oficialidá del asturianu na reforma del estatutu. Con too y con ello, el voceru d'IX nel conceyu de Xixón reconocía que va ser difícil que se llogre y escusaba a la so formación del resultáu final del procesu de reforma estatutaria en casu de qu'esta nun reconoza a la fin la oficialidá del asturianu, cargando les culpes d'ello a PSOE y PP. Nes sos palabres Montes Estrada diz que "a nosotros nun se nos pue pidir que con cuatro diputaos faigamos xuegos malabares".

Pa Montes Estrada "Nun se trata de qu'IX-Bloque por Asturies nos quememos a lo bonzo, trátase de que la mayoría de los asturianos sepan que son les dos fuerces mayoritaries les que s'oponen a reconocer la oficialidá nel nuevu Estatutu".