Moisés Cima Fernández gana’l IV Concursu Amor pola Llingua

‘Métime la llingua hasta'l gargüelu / déxame sentir les tos palabres bien dientro de mi’ ye la frase ganadora del IV Concursu Lliterariu Amor pola Llingua, entamáu por Xunta Moza. L’autor de la mesma ye Moisés Cima Fernández.

El CSOA La Madreña acoyó l’actu d’entrega d’esta actividá que coincide nel tiempu col Día Internacional de la Llingua Materna y cola que Xunta Moza quier recordar “la necesidá de preservar toles llingües, independientemente del so númberu de falantes, y remarcar la importancia de les mesmes nel patrimoniu común de la humanidá”. Un total de 68 concursantes presentaron hasta 132 testos d’una estensión máxima de 140 carauteres –de 124 nel casu d’aquellos qu’escoyeran Twitter como mediu pa unviar la so creación–, nel que los partipantes amosaban el so sentir pa cola llingua. De toos, el que resultó ganador foi’l de Cima, que recibió como premiu material de la Xunta pola Defensa de la Llingua Asturiana (XDLA) y de Xunta Moza, amás de llibros n’asturianu.

El restu de testos finalistes foron los siguientes: ‘La mio llingua nun muerde, la mio llingua nun muerre’; ‘Dime que me quies, fálame’; ‘L'aire qu'espulses al falar ye'l qu'infla los pulmones de la nuesa llingua. Fala p'alendar’. Dende Xunta Moza destacaron l’alta cantidá de participantes, mui superior al d’ediciones anteriores, y el fechu de que “l’apegu idiomáticu crece ente los falantes más mozos”.

Otra manera, nel actu d’entrega del premiu del IV Amor pola Llingua actuó la banda de punk-rock Misiva. Los moscones tán acabantes d’adelantar seis temes del so trabayu nuevu, ‘La gran mentira’.