Misiva y Mala Reputación abren el ciclu de conciertos de la renovada sala Tribeca

La uviedina sala Tribeca abre esti xueves el ciclu de conciertos de primer nivel programáu por Santo Grial pa los meses de mayu y xunu. Dos grupos asturianos, Misiva y Mala Reputación, van encargase de reinaugurar esti espaciu pa 400 persones.
 
El grupu de punk-rock Misiva va ser el primeru en xubir al escenariu a les 21 hores. Nel conciertu, los moscones van ufrir al públicu cantares de ‘Misiva’, primer trabayu del grupu, y del so primer llarga duración ‘Parte de la Solución’, compuestu por dos CD colos mesmos 10 temes, ún canciáu dafechu n’asturianu y otru en castellanu, fiel a la filosofía que lleva’l grupu dende’l so entamu.
 
Mentes, Mala Reputación visita Uviéu en mediu d’una xira per tol Estáu pa presentar el so trabayu nuevu ‘Carácter’. Los de Cangues d’Onís, ún de los grupos más valoraos na escena rock estatal pol so direutu, van tener en Tribeca, sala qu’estrena escenariu y equipu de soníu, un llugar afayadizu pa mostrar les sos armes. El preciu de la entrada pal conciertu ye de 10 euros.
 
A les actuaciones d’estos dos grupos asturianos va siguir, mañana, la de los andaluces Reincidentes, a les 22 hores, que tornen a Asturies tres actuar nel mes d’ochobre en Xixón nel ‘Republicastur’. La entrada pa ver a esta banda histórica del rock estatal ye de 15 euros, anticipada, y de 20, na puerta. Completen la programación de Tribeca pa mayu y xunu, Koma (13 de mayu); El Último ke Zierre (20 de mayu); Angelus Apatrida, Sound of Silence y OST (27 de mayu); Arma X, Alto Asalto y Galán (3 de xunu); y Obus (10 de xunu). Les entraes pa estos conciertos yá tán a la venta en Musikaze.com, Ticketmaster, Santo Grial Producciones (Uviéu), Llibrería Paradiso (Xixón) y Discos Eusebio (Mieres).