Misiva lleva los temes del so trabayu nuevu al actu d’entrega del IV Concursu Amor pola Llingua

La banda de punk-rock Misiva va actuar esti vienres nel actu d’entrega del premiu al ganador del IV Concursu Lliterariu Amor pola Llingua, qu’entama Xunta Moza. Los moscones van interpretar temes del so discu nuevu, ‘Gran mentira’.

El CSOA La Madreña ye’l llugar escoyíu pa fallar el trabayu ganador del concursu lliterariu convocáu en feches cercanes al Día Internacional de la Llingua Materna (21 de febreru) que destaca pola so orixinalidá. Los organizadores busquen que los participantes amuesen el so sentir pa col idioma nun testu d’una estensión máxima de 140 carauteres, de124 nel casu d’aquellos qu’escoyeran Twitter como mediu pa unviar la so creación. Nesta edición presentáronse 68 concursantes con un total de 132 eslóganes, poemes, declaraciones y sentires, a los que se-yos pide qu’acudan al actu, yá que’l ganador va conocese esta mesma nueche. L’autor del testu vencedor va llevase material de la Xunta pola Defensa de la Llingua Asturiana (XDLA) y de Xunta Moza, amás de llibros n’asturianu. L’actu va principiar a les 21 hores.

Pa completar esta folixa reivindicativa alredor del idioma del país, la organización apartidista de mocedá que trabaya pola defensa de los derechos de los asturfalantes va ufrir un conciertu de Misiva, banda que ta acabante de colgar na rede un adelantu de seis temes del so trabayu últimu, ‘Gran mentira’. Trátense de trés cantares n’asturianu (‘Gran mentira’, ‘Punk-rock’ y ‘Revolución TV’) y otres trés en castellanu (‘Soy virtual’, ‘Planeta gris’ y ‘Muros de soledad’). En total, ‘Gran mentira’ tará compuestu por 15 cortes grabaos, mezclaos y masterizaos por Daniel Sevillano.