Misa n’asturianu pa celebrar la navidá

El Coleutivu Fernández de Castro, agrupación de sacerdotes católicos comprometíos col usu y normalización del asturianu nel sen de la Ilesia, celebra na parroquia uvieína de La Merced la Santa Misa oficiándola n'asturianu tolos sábados a les 21:00 h. Esta selmana, con motivu de la fiesta de Navidá, la Santa Misa n'asturianu va celebrase a les 21:00 hores del domingu día 25, nesta mesma parroquia asitiada en barriu de Ciudá Naranco.


El sacerdote Xosé Daniel Rodríguez Arias ye'l director d'esti Coleutivu d'eclesiásticos comprometíos col asturianu y que tuvieron un papel protagonista na traducción al asturianu de testos relixosos, rescamplando ente ellos la edición del Nuevu Testamentu, el volume "Oraciones, bendiciones, pidimientos y cancios relixosos n'asturianu" y la edición de la lliturxa católica n'asturianu. Fundáu nel añu 1986, el coleutivu "Fernández de Castro" entovía echa de menos la figura del so entamador, el xesuita Federico Fierro Botas, que morrió n'accidente de coche nún de los sos viaxes per tierres ruses nel branu del añu 2003.