Ministeriu y Principáu alcuerden torgar la entrada de coches a Cuadonga

La Ministra de Mediu Ambiente, Cristina Narbona, y el Conseyeru de Mediu Ambiente del Gobiernu asturianu Francisco González Buendía, dieron a conocer ayeri un alcuerdu revoluicionariu sobre l'accesibilidá a Cuadonga.

El plan pretende torgar la entrada de coches a Cuadonga, faciendo pionil dafechu la esplanada de la Basílica, y proyecta instalar una subidoria mecánica dende los aparcaderos alternativos que van ponese más abaxo de la Basílica pa que les persones mayores y minusválidos nun tengan problemes d'accesu. D'otra manera, la proyectada variante de Muñigu va facese pero en cuenta de ser una via alternativa d'accesu va quedar esclusivamente como via pionil y pa bicicletes, sacantes casos d'emerxencia en que se precise d'ella, como pal pasu d'ambulancies o bomberos.

El Ministeriu de Mediu Ambiente va ser l'encargáu de mercar el suelu que se precise pa facer les más de 1.000 places d'aparcaderu alternativu que van precisase a lo llargo de la carretera As - 262. L'executivu asturianu, pela so parte, va pagar la subidoria mecánica que va llevar dende los aparcaderos hasta la esplanada de la basílica. En cuantes a la entrada de comerciantes, residentes y trabayadores ello va tener una atención especial.

Ello ye que yá dende'l día 26 de xunetu d'esti mesmu añu tola entrada al complexu de Cuadonga y a los Llagos va sufrir un cambéu radical. Esi mesmu día va echar a andar el Plan del Gobiernu asturianu que yá taba planteau de va tiempu y que va torgar la entrada de coches particulares a la carretera que xube a los Llagos. En cuenta d'ello van ponese coches de llinia que, por un preciu de 6 euros, van xubir al turista a los Llagos, desaniciando la imaxe d'atascos y caos circulatoriu que consaba bien mal col espaciu natural que ye'l Parque Nacional de los Picos d'Europa. Dende'l 2006 esti plan tendrá de complementase cola conversión de Cuadonga nun espaciu pionil, si salir sal alantre esti plan como ta previsto, anque pa ello tien de pasar primero pela Comisión Mista del Parque.