Militantes y cargos presenten una corriente pol cambéu nel PAS

Cargos y militantes del Partíu Asturianista presentaron esta mañana en Xixón el manifiestu pol Cambiu y la Renovación nel Partíu Asturianista, documentu col que quieren crear una corriente interna dientro de la formación asturianista. La corriente nueva ñaz "col obxetivu d'impulsar unes nueves formes y un clima diferente dientro del partíu". La corriente d'opinión asturianista encabécenla militantes de vieyo del partíu y que tienen o tovieron cargos d'importancia na formación, casu de José Manuel Balbuena, que foi candidatu a l'alcaldía de Xixón, César Fernández, miembru de la Xunta Nacional del PAS o Xabiel García Pañeda, secretariu de Xuventú Asturianista.

Los integrantes de la corriente xustifiquen l'apaición d'esta en cuantes que, 100 díes dempués del últimu congresu del PAS, en que s'evaluaron los resultaos de les elecciones de marzu, de les que'l PAS salió con ún de los peores resultaos de la so historia. Al dicir de los miembros de la corriente, el PAS fizo n'aquel congresu de xunetu un propósitu d'enmienda y de cambéu que nun s'atalanta nenyuri, lo que ta llevando a la organización a ser "un partíu peslláu y cada vegada más lloñe de la sociedá asturiana". Faciendo analís de la trayectoria del partíu, la corriente entiende que, anque'l partíu perdió la metada de los sos votos y tola representación institucional, ello nun s'acompañó d'una autocrítica, saliendo del congresu de xunetu una executiva continuista que significó un "enroque" en pallabres de Balbuena y que llevó al partíu per una vía muerta na que l'actividá político y la presencia social amenorgaben.

En consecuencia, la nueva Plataforma pol Cambiu ve que ye preciso "el cambiu radical y absolutu de les estructures del nuesu partíu" y entiende que "el proyectu del PAS necesita presentase énte la sociedá asturiana con una renovación total pa que seya creible". José manuel balbuena esplicó qu'esti cambéu tien de ser de discursu y d'organización, y quexóse de que l'actual estructura del PAS encóntase nun modelu presidencialista y vertical que nun ye'l más afayadizu. La corriente interpreta que pidir el cambéu del partíu nun ye traicionar a la organización nin a les persones que lleven años trabayando por ella. movíos por "el cariñu al partíu en que militamos" los miembros de la corriente dicen que quieren remocicar el partíu pa meyor, y márquense como ún de los sos oxetivos el recuperar a la bayura d'antiguos militantes que dexaron la pertenencia al partíu o la militancia activa.

Aparte d'entamar un procesu de cambéu internu, los representantes de la corriente quieren abrir un procesu de diálogu y d'entendimientu con otres fuerces asturianistes, y, anque nun quixeron concretar posibles aliances, punxeron les autonómiques de 2007 como horizonte de trabayu.