Milio Cueto presenta "La piedra de la culebra"

L'escritor xixonés Milio Rodríguez Cueto presenta esta selmana la novela "La piedra de la Culebra" obra en castellanu que s'empobina a un públicu mozu y que tien por tresfondu la invasión francesa de 1808.

Conocíu pal públicu asturianu pola so obra en llingua asturiana, con noveles como "Románticu" y llibros de cuentos como "Aventures", Milio Rodríguez Cueto tien una doble vida lliteraria, alternando los sos escritos n'asturianu con otros en castellanu, bien d'ellos dedicaos al públicu xuvenil, como foi'l casu de Mimí al Volante" col que ganó'l premiu Edebé de lliteratura xuvenil. Amás del cambéu d'idioma, esti Milio Cueto castellanu presenta un estilu distintu dafechu, con diálogos más graves y ensin que se note tanto la so retranca característica. Como diz l'autor "tengo dos llinies paraleles, nuna préstame esplorar les posibilidaes narratives d'una llingua que tradicionalmente nun se trabayó muncho pa la novela y na otra doi un paséu per un camín que yá anduvieron munchos".

Per esta segunda llinia vien esta "Piedra de la culebra". Empobinada a un públicu xuvenl de 14 años en p'alantre, pero recomendable pa la xente adulto, la novela, que recuerda pola temática y l'esquema a los Episodios Nacionales de Benito Pérez Galdós, garra'l tresfondu históricu de la invasión napoleónica nel 1808 y asitia sobre esti contestu al protagonista, un rapaz de la parroquia xixonesa de Llantones "un poco curtiu d'entendederes" según diz Milio Cueto, que por salvar a la so hermana acaba axuntándose a la delegación asturiana que marcha a Londres, ciudá onde se desarrolla tola segunda parte de la novela, a negociar colos ingleses la resistencia al invasor francés.