Miles de persones despiden en Mieres a los mineros que participen na ‘Marcha prieta’ a Madrid

Ochenta mineros partieron na mañana d’esti vienres a Madrid n’otra midida de protesta contra los recortes al carbón. Los trabayadores de la tercera ‘Marcha prieta’ nun tuvieron solos na salida, yá que miles de persones acudieron a despidilos.
 
Los participantes nesta marcha en defensa del sector, que formen parte de los sindicatos CC OO y SOMA-FITAG-UXT, salieron de la Casa Conceyu de Mieres y de Barreo, de manera respeutiva, y tomaron rumbu hasta Campumanes, final de la primer de les 19 etapes previstes nel so camín hacia’l Ministeriu d’Industria. Nun actu previu del SOMA-FITAG-UXT, celebráu nel campus universitariu, el so secretariu xeneral, José Ángel Fernández Villa, aseguró qu’esta protesta forma parte de les movilizaciones pa terminar col "inmovilismu del Gobiernu central". Tamién señaló que, a lo llargo de la marcha a Madrid, tendrán "la vista puesta" noz mineros zarraos nos pozos Candín y Santiago, que cumplen "25 díes a 600 metros baxo tierra".
 
Al mesmu tiempu que los mineros asturianos, tomaron salida los lleoneses y los aragoneses. En La Robla ta previsto la xunión de la marcha con orixe n’Asturies y Lleón, mentes que la incorporación de los compañeros d’Aragón va tener llugar cerca de Madrid. El día de llegada a la capital castellana va ser el 11 de xunu, cuando ta convocada una gran manifestación en defensa del carbón.