Miles de manifestantes tomen El Cairu y otras ciudades

Miles de manifestantes tomaron les cais del centru d'El Cairu y d'otres ciudaes del país, según informaron testigos presenciales. Según la cadena de televisión Al Yazira, les fuerces de seguridá tán disparando gases llarimosos.

Los activistes declararon esti día'l 'Vienres de la Ira', según pudo comprobar Reuters dende El Cairu. 'Abaxo Hosni Mubarak', cantaben los manifestantes, mientres tiraben piedres a los axentes de Policía que los arrodiaben y que-yos atacaben con cañones d'agua nel esterior de la mezquita cairota na que s'atopaba'l políticu opositor Mohamed ElBaradei.
  
Aparte, miles de persones salieron a les cais en Suez, nes ciudaes de Mansura y Sharqiya, nel Delta del Nilo, según informaron Reuters y fontes opositores. Los axentes de Policía dispararon gases llarimosos en Mansura, mientres cientos de manifestantes se concentraron en Suez al términu de la oración del vienres y los activistes tán llamando a tomar les cais al traviés d'Internet.
  
La Policía disparó bales de goma contra miles de manifestantes que-y tiraben piedres al pie de la mezquita d'A'l Azhar, n'El Cairu, al términu de la oración del vienres.
  
L'ensame empezó a tirar piedres contra los axentes mientres entonaben lemes contra'l presidente Hosni Mubarak y el so fíu y virtual sucesor, Gamal. "La xente quier el final del réxime", "Non a la sucesión", "Abaxo Hosni Mubarak", glayaben.
  
Los manifestantes exipcios empezaron a concentrase cerca d'una residencia del presidente Hosni Mubarak n'El Cairu, según la cadena de televisión Al Yazira.