Migoya y Madera van declarar como imputaos nel ‘Casu Marea’

El xuez citó a declarar a otros dos cargos del Gobiernu d'Álvarez Areces como imputaos nel ‘Casu Marea’ de presunta corrupción na Alministración. Éstos son la ex conseyera Ana Rosa Migoya y l’ex direutor xeneral Carlos Madera.

Les declaraciones de l’acusada principal, Marta Renedo, ex funcionaria de les conseyería de Cultura y Alministraciones Públiques, nes qu’implicaba a los sos superiores en contrataciones irregulares, llevó al maxistráu Ángel Sorando a llamar a declarar el 8 de marzu próximu a Migoya y a Madera. Estes práutiques desarrollaríanse mientres el pasu de Renedo en Cultura cuando los dos socialistes ocupaben los cargos de conseyera y de direutor xeneral de Promoción Cultural, de manera respeutiva.

Tres conocer esta decisión del xuez al traviés de los medios de comunicación, Migoya negó dar orde nenguna a Renedo nesa etapa y que tuviere dalgo que ver colos fechos que s’investiguen. Nesi sen, recordó que foi ella quién denunció a la ex funcionaria tres deteutar irregularidaes. Pela so parte, Madera señaló que nunca recibió nin dio instrucciones pa cometer illegalidaes. La FSA-PSOE, que suma estos dos nomes a otros socialistes imputaos nel 2011 pol casu de presunta corrupción na Alministración, José Luis Iglesias Riopedre y María Jesús Otero, afirmó respetar la decisión del xuez, pero confía na inocencia de Migoya y Madera.