Migoya reconoz que "Air Asturias" nun va entamar a operar hasta setiembre

La Conseyera de Cultura Ana Rosa Migoya almitió esti llunes na Xunta Xeneral del Principáu retrucando a entrugues del PP que la compañía Air Asturias, que se contaba con qu'entamare a operar en xunu, comunicó un retrasu del aniciu de les sos operaciones nel Aeropuertu d'Asturies hasta'l mes de setiembre, mientres que la compañía EasyJet nun contempla pel momentu entamar llinies nueves aparte de la que caltién con Londres -Stansted. El diputáu del PP Jose Manuel Felgueres culpó d'incompetente al executivu asturianu por nun atropar más "vuelos baratos" y punxo'l casu de Cantabria, onde l'aeropuertu local tien delles conexones con países estranxeros. Ana Rosa Migoya afirmó que los dos casos nun son comparables y que colos númberos na mano nun pue demostrase que Cantabria tenga más turismu por causa de los vuelos baratos. El presidente de la comisión parlamentaria llamó al orde a la diputada del PP Alejandra Cuétara por facer xuicios de valor nel turnu d'entrugues. Cuétara afirmó que'l Principáu "nun podía volar más baxo".