Mieres y Piloña acueyen unes xornaes sobre la memoria histórica

Entámenles Reflexu y Les Ablanes y lleven el nome de 'Desenterrando la hestoria. Memoria, represión y llucha n'Asturies del sieglu XX'.

"Creyemos que poner en valor el pasáu pa caltener viva la memoria, aldericar, buscar y ufiertar ferramientes de cambéu y tresformación d'esta realidá social ye un llabor d'urxencia", apunten los dos coleutivos culturales con sede en Mieres y L'Infiestu, de manera respeutiva, que ven la necesidá "de concienciar al rodiu de la represión política n'Asturies nel sieglu XX y de visibilizar y rescatar del escaezu aquella parte de la hestoria que foi silenciada y apartada de los discursos hexemónicos". Por esta razón convocaron a dellos espertos que trataren esta temática dende ámbitos diferentes, axuntando "per un llau, la parte académica y/o teórica dende una perspeutiva hestórica y, per otru, la parte más práutica cola fin d'amosar y poner en valor aquelles ferramientes como'l cine, la educación o la lliteratura, claves pa la tresformación social".

L'historiador Faustino Zapico va abrir les xornaes esta tarde, a les 19 hores nel Auditoriu Teodoro Cuesta de Mieres, cola conferencia d'una hora de llargor 'La memoria democrática nel sistema educativu', a la que va siguir l'artista Alberto Vázquez con 'El procesu de creación del cómic 'Los llazos coloraos'. La historia de les fuelgues mineres n'Asturies (1957-1964)'. Mañana'l turnu va ser pa Heri Gutiérrez García, a les 11 hores, con 'Los procesos de creación de posmemoria por el trauma derivado de la represión franquista contra las mujeres del valle del Nalón (1937-1958)', pa siguir con Eduardo Abad y 'Violencia, terror y represión n'Asturies en transición', mentes que pela tarde, dende les 16 hores, van intervenir Fe Santoveña, con 'Exaltación y olvido. Una mirada a la muerte desde la antropología social y cultura'; Pablo Casanueva, con 'De la memoria familiar a la memoria colectiva. El cine como ferramienta'; y Luis Felipe Capellín, con 'La guerrilla antifranquista n'Asturies'. 

Conciertu con cantares de la Revolución del 34

L'actividá en Piloña, na Sala Polivalente de L'Infiestu, va tener llugar la selmana próxima, tamién de vienres y sábadu. La primera va tar protagonizada, a partir de les 19 hores, por Carlos González Espina con 'Semeyes pa dempués d'una guerra', al que va siguir Ramón Lluís Bande con 'El cine como dispositivu de memoria'.

Al día siguiente, a les 11 hores, Irene Faza va falar de 'Más allá de lo domésticu. La memoria de les llabradores piloñeses de Posguerra', y José Antonio Longo de la 'Violencia demientres la Guerra Civil y la Posguerra en Piloña'. Yá de tarde, dende les 16 hores, Elías Llano, Viti Redondo y Rodri Joglar van dar un conciertu entituláu 'Cantares de la Revolución d'Ochobre'.

Darréu, a les 16.30 hores, Inaciu Galán va ufrir la intervención '¿Persiguióse l'asturianu nel Franquismu? Repás históricu a la situación de la llingua asturiana na dictadura (1939-1976)', pa poner el ramu a les xornaes depués Arantxa Margolles con 'De les tumbes pa los vencedores a les cunetes de los que perdieron: la recuperación diferencial de la memoria dende'l fin de la Guerra Civil'.

Reserva de plaza

Por mor de la situación sanitaria, qu'obliga a la reducción de los aforos al 30 por cientu, les persones que quieran asistir a les conferencies han acutar plaza al traviés del corréu electrónicu reflexuablaneru@gmail.com o del númberu de teléfonu 684.039.896. Les intervenciones complétense, tanto en Mieres como en L'Infiestu, con una esposición fotográfica sobre l'Asturies de la Guerra Civil y la Posguerra.