Mieres vive una edición nueva de la Folixa na Primavera

Dende esti vienres y hasta’l domingu, Mieres va vivir una edición nueva de la Folixa na Primavera, la decimosétima. Los llocales Sácava y los escoceses Skerryvore van protagonizar el conciertu del sábadu nel Parque Xovellanos.
 
El periodista Juan Ramón Lucas va encargase d’abrir les actividaes de la Folixa nel Auditoriu de la Casa la Cultura esta tarde, a les 20 hores, cola llectura del pregón, anque enantes va tener llugar l’apertura del Mercáu Celta nel Parque Xovellanos y un pasucais, a les 18 hores, del Grupu de Baille Xorrecer que va terminar n’El Requexu. Tres la intervención del pregoneru, va celebrase la entrega del XII Distintivu Fini Suárez a la Investigación Folclórica, qu’esti añu ye pa l’Asociación pa la Recuperación de Los Sidros y Les Comedies ‘El Cencerru’, de Valdesoto, “pol so gran trabayu pa recuperar l’importante patrimonio cultural que suponen les mazcaraes d’ inviernu”.
 
Les actividaes van continuar coles actuaciones de Macadamia (20.30 hores, cai Fernández Cabezas), Anabel Santiago y Héctor Braga (21.30 hores, cai Jerónimo Ibrán) y Celso Díaz y Miguel Ángel Martínez (22.30 hores, cai La Vega). Mentes, a partir de les 23 hores, la Hostelería del Parque Xovellanos entama un conciertu cola participación de Duerna y Pelgares.
 
Pal sábadu pela manaña ta previsto l’espiche de les pipes de sidra al meudía, a lo que siguirá l’actuación de los Danzadores Villa de Briones, de La Rioja, y del Grupu de Baille Ruxidera, pa dar animación al Mercáu Celta del Parque Xovellanos. Yá de tarde, a les 17 hores, van tener llugar xuegos pa neños y neñes pa, a les 19 hores, abrir otra vegada la preba de sidra. Cinco minutos más tarda va dar entamu’l Festival de Tonada, nel que van participar Celestino Rozada, José Antonio ‘Cantu la Vara’, María Llatores y José Manuel García, con Iván Rionda a la gaita. Una hora más tarde, la Banda Gaites Mieres del Camín y los grupos de baille Vila Verde (Portugal) y L’Artuzu van dar una actuación.
 
Pa zarrar la xornada, van tener llugar, a partir de les 23 hores los conciertos principales de la Folixa cola participación de Sácava y de Skerryvore, banda escocesa que fusiona la música tradicional d’Alba col rock. A les 2.45 hores, va interpretase la Danza d’Oñón.
 
Tamién al meudía va principiar l’espiche de les pipes el domingu. Nesta ocasión, los encargaos d’amenizar el Mercáu Celta van ser el Grupu Folclóricu Prau Llerón –que va repetir actuación a les 13.30 hores n’El Requexu–. Mentes, pa les 13.30 hores, ta previsto un conciertu de la Banda de Música Mieres del Camín, que va zarrar una Folixa na Primavera que, pese a contar con un presupuestu un 40 por cientu menor que nel 2011, presente un programa completu y de calidá.
 
Menú de la Folixa
 
Los mierenses y les persones que s’averen a la ciudá estos trés díes tamién van poder disfrutar del menú gastronómicu de la Folixa na Primavera. Ésti ta compuestu por sopa d’ablanes o menestra del tiempu, de primer platu; bacaláu o cabritu, de segundu; y borrachinos o sorbete de sidra, de postre.