Mieres vive un festival multicultural esti fin de selmana

El festival presentólu nel día d'ayeri Diana González, responsable de la conceyalía de de Mocedá de Mieres. Con elli preténdese que los próximos 20 y 21 de mayu Mieres viva un espectáculu artísticu permanente cola cai como escenariu principal.

El programa ta centráu n'espresiones artístiques que se desenvuelven na cai,
"reivindicándola como espaciu dignu pa la realización y amuesa de propuestes novedoses" ente elles la recreación teatral d'un mercáu de verduleres interaccionáu col públicu de la cai, baillarines de claqué, estatues vivientes, globoflexa, talleres de capoeira, hip hop, graffiti o zancos ente otros. Pa llevar alantre esti festival, la Conceyalía de Mocedá va trabayar cola compañía
Producciones Nun Tris, que yá s'encargó de la organización de la primera edición d'esti festival l'añu pasáu, que tuvo abondo éxitu. La conceyala de Mocedá quixo rescamplar que'l próximu fin de selmana Mieres "va convertise nun gran escaparate d'arte y cultura como son les Rambles de Barcelona: Esi ye l'ambiente que queremos recrear y algamar".