Mieres presenta un festival pa echase al matu

Esta tarde, na FNAC del Centru Comercial Parque Principado preséntase'l cartel del primer "Matu - Festival" una serie de conciertos que van celebrase en Mieres los díes 29 y 30 d'abril na Sala Mausoleo. La presentación va facese col acompañamientu musical de los Far-Tones, un grupu nacíu de les povises d'una de banda asturiana importante de los 90 como fueron los Mockingbirds.

Y dalgo tien que ver col renacer de coses vieyes la idea de crear esti primer "Matu Festival" en cuantes que la idea pa ello surdió d'un garapiellu de mozos de Mieres señaldosos de la escena musical que refervía nes cuenques va namás unos años. La solución pa recuperar aquel ambiente foi la creación d'un festival nel que van poner nel escenariu a un bon puñáu de bandes underground de toles procedencies anque marcaos pol cuñu del garaje-rock. Ente elles van tar Amon Ra ganadores de los concursos de maquetes d'Uviéu y Mieres y finalistes nel Bilborock. Grupos como Holy Sheep, Soul Gestapo, Hollywood Sinners, Dogfight o Stanley Road completen la llista de grupos xunta bandes locales como Kinki Machine o Los Energéticos pa dos nueches de conciertos que van terminar con sesión de dj´s.

Más información na web del Matu Festival