MIAS esixe servicios de tresporte de nueche ente les grandes ciudaes asturianes

La organización de Mocedá d'Izquierda Asturiana pidió la implantación de llinies de tresporte que comuniquen los principales centros de población del país n'horariu de nueche. La organización llamenta que RENFE y ALSA suspendan los sos servicios n'ocasiones en más d'ocho hores ente les principales ciudaes asturianes, ello mientres que llugares de menor población fuera del triángulu Xixón-Avilés-Uviéu, queden incomunicaos durante plazos enforma más llargos.

Dende Mocedá d'Izquierda Asturiana afírmase que "esta llaguna nel serviciu de tresporte público nun ye propia d'un país cola densidá poblacional del nuesu, y menos, d'una rede de ciudaes y localidaes tan próximes ente les que se produz un continuu intercambiu de población". Como posible solución, la organización pide que s'inxerten nos horarios de los principales medios de comunicación del país d'un par de conexones nocturnes a lo llargo la nueche en dambos sentíos y ente, como poco, los conceyos de la rexón central del país, los más habitaos y que son los que faen d'enganche con otres fasteres d'Asturies.