Mediu Rural va soltar 45.000 exemplares de 'Torymus sinensis' pa combatir l’aviéspora de la castañal

El programa añal pal control de la plaga d’aviéspora de la castañal cuenta lliberar 45.000 exemplares de Torymus sinensis esti exerciciu en 210 puntos de 49 conceyos, lo que supón 47 zones nueves y 25 territorios más. Esti insectu facilita el control biolóxicu del patóxenu.

El direutor xeneral d’Infraestructures Rurales y Montes, Fernando Prendes, presentó güei les previsiones pa esta campaña n’Allande, ún de los conceyos más estensos, de gran potencial forestal, y onde les castañales ocupen un espaciu preponderante. Esplicó que, amás de reforzar y ampliar les actuaciones nes ales del país y en zones con altes densidaes de castañal ensin cubrir en programes anteriores, va impulsase la participación de los habitantes de les árees rurales, a los que se solicita qu’informen de los llugares onde consideren necesario facer una suelta.

El 20 por cientu de los Torymus sinensis que se suelten anguaño proceden del Centru d’Alerta y Control de Plagues y Especies Invasores de La Mata, asitiáu nel conceyu de Grau. Va dos años púnxose en marcha un plan de producción en cautividá d’esti parasitoide cola mira de que la producción autóctona aumente progresivamente hasta dar respuesta a les necesidaes de suelta nel país.

Nesti centru tamién se tán desenvolviendo estudios pa determinar l’establecimientu de les poblaciones del parasitoide de les primeres sueltes y, a falta de rematar l’estudiu, la Conseyería de Mediu Rural y Cohesión Territorial apunta que ta siendo exitosa.

Afeiciones al árbol

L’aviéspora del castañu afeuta a la medría maderera del árbol, provoca la perda d’un altu porcentaxe de frutos y tien repercusiones na producción apícola. El so control por otros métodos, como los insecticides o téuniques análogues, resultó inviable y n’estaos como Italia, que sufren esta plaga dende va venti años, los datos tamién avalen l’éxitu de la suelta de Torymus sinensis.

Esta especie detectóse la primer vez en Les Regueres y en malpenes cuatro años colonizó toa Asturies. El so avance viose favorecíu por dellos factores, como la so gran eficiencia reproductora y la continuidá de les mates de castañal nel país.

Na semeya, un exemplar de Torymus sinensis.