Mediu Rural defende la pesca artesanal asturiana énte la propuesta de la XE de vedar les captures n'ecosistemes vulnerables

El Gobiernu presentó a la secretaria xeneral de Pesca del Ministeriu d’Agricultura, Pesca y Alimentación, Isabel Artime, un estudiu que confirma “l’impautu nulu” que l’arte de pesca mayoritariu n’Asturies tien nos ecosistemes marinos vulnerables. La Comisión Europea propón nun dictame vedar la captura en caladeros de la costa asturiana.

L’estudiu reflexa que’l 89 por cientu utiliza artes fixes de fondu distintes al arrastre y que’l 72 por cientu desempeña dalgún oficiu artesanal nel que s’usen artes menores. Tamién asegura que’l plantegamientu de la Xunión Europea (XE) tendrá una afeición mui negativa pa la pesca artesanal asturiana, que tien una gran dependencia de los caladeros sobre los qu’Europa pretende intervenir.

Dende Mediu Rural y Política Agraria señalen que la prohibición acarriaría implicaciones negatives sobre la equidá territorial y la sostenibilidá de l’actividad pesquera, al concentrar la restricción global pal golfu de Bizkaia sobre les árees de pesca más importantes de la comunidá, xeneraría mayor concentración y desplazamientu del esfuerzu a otres zones non afeutaes y penalizaría principalmente a les flotas artesanales, qu’históricamente prautica una pesca con artes fixes potencialmente compatibles cola conservación de fondos marinos. La especie clave pa la sobrevivencia de la flota nacional ye la merluza, captura de la que dependen de forma crítica los puertos asturianos, y recuerden que’l 50 por cientu de los oficios de pesca con artes fixe de fondu persigue esta especie como oxetivu únicu o principal.

Les conclusiones del estudiu tamién reflexen que los ecosistemes marinos vulnerables propuestos pola XE se llocalicen en zones onde históricamente esitió una actividá pesquera de fondu, y qu’a pesar d’ello conserven una gran biodiversidá marina. “La nuesa flota utiliza gran variedá d’oficios de pesca con artes fixos y que toquen el fondu, munchos d’ellos estacionales, desendolcaos por embarcaciones de pequeña escala y marcáu calter artesanal”, espunxo’l conseyeru Marcelinos Marcos, que rescampló que la pesca n’Asturies “xenera una actividá bien allineada colos principios actuales de les polítiques europees en materia de sostenibilidá y mediu ambiente, y carauterizada pola so compatibilidá cola conservación de los ecosistemes marinos”.

Afeutaría “de forma severa” al 48 por cientu de la flota

L’ex presidente de la Xunta Xeneral solicitó ayeri al ministeriu nuna xunta en Madrid que defenda énte la XE l’actividá pesquera de la flota asturiana en zones que s’incluyeron na futura declaración de los ecosistemes marinos vulnerables llueu d'un dictame de la Comisión Europea qu'ampiaba los espacios propuesto nun primer momentu. Les estimaciones del Gobiernu apunten que la veda afeutaría de forma severa a cerca del 48 por cientu de la flota, que perxudicaría especialmente al 79 por cientu de los barcos de menos de doce metros d’eslora y que tendría una incidencia negativa en 13 de los 19 puertos del país.

Na semeya, Francisco José González Rodríguez, direutor xeneral de Pesca Marítima; Artime; y Marcos.