Mediu millar de persones esamínense nes pruebes de certificación d'asturianu

Esti sábadu arrancaron n’Uviéu les pruebes de certificación de Llingua Asturiana adaptaes al Marcu Común Européu de Referencia pa les Llingües, que viven la so segunda convocatoria cola estrena del nivel avanzáu C1. 476 persones participen nos esámenes, que van retomase'l llunes 18, de los que 283 se presenten al intermediu B2.

Los exercicios de la parte escrita, esto ye la producción y coproducción de testos escritos, la comprensión de testos orales y la comprensión de testos escritos, abrieron estes pruebes a les 9.20 hores, anque pol protocolu COVID-19 los aspirantes empezaron a entrar a les 8.20 hores, según l’apellíu, na Facultá de Formación del Profesoráu y Educación de la Universidá d’Uviéu. Los esámenes allargáronse hasta les 13.50 hores, quedando agora pendiente la parte oral: producción y coproducción de testos orales, y mediación.

Nesti casu, los esámenes van principiar el llunes vinientes, otorgando a cada persona un día determináu, tamién según l’apellíu, pa facer los exercicios. Pa ser catalogáu como aptu ye necesario aprobar les cinco pruebes y tener una media superior al 6.

Si nel cursu pasáu hebo 407 matriculaciones –el tope yera de 500 places, pero dalgunes persones nun fixeron el trámite de pagar les tases– con cuasi 800 solicitúes, nesta ocasión tuvieron derechu a amosar el so nivel d’asturianu 476, de los que 283 se presentaron al B2 y 193 al C1. Na convocatoria actual la llende yera de 300 asientos por nivel, que nel casu del intermediu sumaron 431 pidimientos, quedando asina fuera 131 aspirantes.

Na semeya, un grupu de persones qu'acudieron al C1 esperen la so entrada a la Facultá de Formación del Profesoráu y Educación de la Universidá d’Uviéu nel turnu últimu d'accesu a les aules.