Mediu millar de mandatarios, presentes en Londres nel funeral d'Elizabeth II

España tuvo representada polos reis, a los que'l protocolu asitió xunto colos eméritos.

Esta mañana celebróse na abadía de Westminster el funeral d'Elizabeth II, reina del Reinu Xuníu y de los otros reinos de la Commonwealth dende'l 1952, finada'l pasáu día 8 a los 96 años. Un total de 2.000 convidaos acudieron a la despidida, ente ellos 500 mandatarios de práuticamente tolos estaos del mundu.

La representación española correspondió-y al xefe d'Estáu, Felipe VI, acompañáu de Letizia, anque tamién acudieron los eméritos Juan Carlos y Sofía, familia de la monarca británica. El protocolu asitiólo xuntos nel funeral magar l'esmolecimientu de la Casa Real pola repercusión negativa que tendría esa imaxe pal actual rei actual polos fechos protagonizaos pol so padre, que sigue viviendo en solitariu nos Emiratos Arabes Xuníos.

Elizabeth II nuna imaxe del 2011. Semeya recortada a partir de la obra de Julian Calder pal Gobiernu de Nueva Zelanda baxo llicencia CC BY 4.0.