Mediu Ambiente y Llanes pretenden l’aprobación d’unes normes urbanístiques provisionales

L’oxetivu d’esta operación ye non interrumpir el desarrollu urbanísticu de Llanes. La conseyería propúnxolo ayeri y el conceyu va solicitalo pronto pa tener esta normativa urbanística disponible nun plazu de tres a seis meses.
 
Nun comunicáu de prensa, la Conseyería de Mediu Ambiente, Ordenación del Territoriu y Infraestructures anunció que va recomendar esta opción al Conseyu de Gobiernu como la meyor posible tres la sentencia del Tribunal Supremu que confirmaba la suspensión del Plan Xeneral d’Ordenación Urbana (PXOU) del conceyu de Llanes. Ello se debe a qu’esta anulación “remitiría la llegalidá a les normas anteriores vixentes y el Principáu entiende que nun podríen atender la realidá urbanística actual”. Con esta normativa provisional, Mediu Ambiente pretende mantener la actividá urbanística nel conceyu al nun vese paralizada “en nengún casu, sinón llimitada en dalgunos ámbitos d’actuación”.
 
Mentes, de forma paralela, el conceyu de Llanes va siguir cola redacción y tramitación del PXOU nuevu. Ayeri, tres les reclamaciones de dimisión de l’alcaldesa por parte de coleutivos como Andecha Astur, el Bloque por Asturies o l’Asociación de Vecinos y Amigos de Llanes (Avall), Dolores Álvarez Campillo fixo declaraciones a los medios sobre la situación na queda’l conceyu tres la sentencia del Supremu. La primer edil negó la posibilidá de derribos masivos y aseguró que toles llicencies otorgaes hasta’l llunes, día nel que se conoció’l fallu del tribunal, son “llegales y vixentes”.