Mediu Ambiente va matar llobos en Tinéu

El Principáu comprometiose colos ganaderos y l'alcalde de Tinéu a facer controles sobre la población de llobos del conceyu. La midida respuende a la presión de los ganaderos, que denunciaron estes selmanes los ataques del llobu.

Los responsables de la Conseyería y la guardería Rural tuvieron ayeri una entrevista colos ganaderos afectaos polos daños del llobu en Tinéu. A la reunión, que se celebró na casa conceyu de tinéu asistió l'alcalde Ceferino Osendi.

Como resultáu de la entrevista llegóse al alcuerdu de que la Guardería entame, dende la selmana qu'entra y hasta la primavera del 2005, controles de llobos nel conceyu que van enxertase dientro del "Programa Anual de Control del llobu 2004-2005" que s'aprebó en xunu. Los ganaderos van ser quien diga cuales son los llugares onde ye más prioritario actuar, y yá se dio anuncia de que les primeres recerques van facese pa la parte del Picu Espina.