Mediu Ambiente autoriza a Tudela Veguín la quema de más residuos especiales nos sos fornos d’Aboño

Tudela Veguín va poder quemar más residuos especiales nos sos fornos d’Aboño tres la modificación de l’Autorización Ambientral Integrada aprobada por Mediu Ambiente. La Coordinadora llamenta que s’autorice esta resolución.
 
Según esplica’l coleutivu tres conocer la disposición publicada nel BOPA del sábadu, la Conseyería de Mediu Ambiente, Ordenación del Territoriu y Infraestructures permite a la empresa la quema de más residuos especiales en sustitución de combustible tradicional. Asina, la resolución da lluz verde a Tudela Veguín pa quemar residuos pesaos de fragmentación de vehículos, fundamentalmente plásticos d’automóviles, con un conteníu significativu en cloru, y residuos domésticos y asimilables xeneraos en comercios, industries y instituciones, ensin determinar cuáles pueden ser. “Esta práutica peligrosa d’incinerar residuos nuna cementera, que ta preparada pa facer clinker pa cementu, non pa destruyir residuos, ta mui cuestionada en toda España”, afirmen dende la Coordinadora Ecoloxista d’Asturies, que ponen l’exemplu de la cementera d’El Toral, n’El Bierzu, que tien la prohibición de la Xunta de Castilla y Lléon, tres una presión popolar fuerte, de quemar estos residuos pola contaminación asociada que xenera.
 
“Nun podemos aceptar qu’una planta de producción de cementu que yá tien problemes ambientales graves nel so procesu y que duplicó’l so tamañu, se convierta nuna planta de tratamientu de residuos industriales, colos riesgos que suponen pa los vecinos estos materiales y los sos tratamientos. Too ello p’abaratar costes a cuenta de la salú de la xente. Asturies tien que mirar lo qu’asocedió n’El Bierzu y n’otros llugares pa pensar en qu’equí tamos tragando lo que nun quieren n’otros llaos”, sentencien dende’l coleutivu ecoloxista, que llamenta que’l Gobiernu autorice “por resolución y ensin trámite informativu” a Tudela Veguín estes quemes nos sos fornos d’Aboño.