Mediu Ambiente asegura que nun autorizó a Química del Nalón la quema de residuos

Mediu Ambiente retrucó esta selmana a la Coordinadora Ecoloxista que la conseyería nun autorizó la quema de residuu nengún a Química del Nalón. Asegura que lo que permitió ye la incorporación d’un restu non peligrosu al procesu de fabricación.
 
“A partir d’una información difundida pola ‘Coordinadora Ecologista de Asturias’, la Conseyería de Mediu Ambiente, Ordenación del Territoriu y Infraestructures desmiente que se diera autorización a la empresa Química del Nalón pa quemar un residuu nuevu na so planta de Ciañu”, asegura nun comunicáu. Depués, puntualiza que lo qu’autorizó a la compañía foi la incorporación al so proceso de fabricación “un residuu non peligrosu que, en nengún caso comporta incineración dalguna nin alteración de la cantidá d’emisiones autorizaes pola alministración autonómica”. En concreto, según señalen, l’Autorización Ambiental Integrada permite a la planta de Ciañu xestionar un restu non peligrosu que la empresa obtién nes instalaciones de la población lucense de San Ciprián pa que pueda utilizalo nes bateríes de coque que tien en Ciañu.
 
D’igual forma, Mediu Ambiente quier aclarar que lo qu’aprobó ye “una modificación non sustancial de l’Autorización Ambiental Integrada de dicha empresa y, polo tanto, nun requier pasar nengún proceso d’información pública”. Eso modificación espublizóse’l día 7 d’abril nel Boletín Oficial del Principáu d’Asturias (BOPA), según informen.
 
La Coordinadora Ecoloxista d’Asturies tamién fixo referencia’l llunés pasáu a un permisu de Química del Nalón p’aumentar la cantidá de sulfatos vertíos al dominiu públicu cuando éstos dan un sabor amargu y un golor fuerte al agua. Nesi sen, Mediu Ambiente retrucó que quien modificó los valores foi la Confederación Hidrográfica del Cantábricu.