Selmana de les Lletres Asturianes

May pierde la mayoría absoluta conservadora nel Parllamentu británicu y Corbyn pide la so dimisión

|

El Conservative and Unionist Party ganó les eleiciones anticipaes nel Reinu Xuníu, anque perdió la so mayoría absoluta, lo que llevó al llaborista Jeremy Corbyn a pidir la dimisión de Theresa May. Sinn Féin y Plaid Cymru ameyoren resultaos, mentes que’l Scottish National Party (SNP) pierde 21 parllamentarios.

La xugada nun-y salió como esperaba y May nun va vese reforciada pa comenzar la negociación del Brexit con Bruxeles. Los conservadores perdieron 12 escaños nes eleiciones anticipaes d’ayeri y, con ello, la mayoría absoluta (326 parllamentarios) al quedar con 318.

El Labour Party quedó lloñe de los conservadores, al sumar 261 asientos, 29 más que na anterior cita coles urnes, pero Corbyn viose llexitimáu pa reclamar a May la so dimisión alegando una perda de confianza de la ciudadanía. Sicasí, l’actual primer ministra refuga esta opción y yá piensa en llegar a un alcuerdu colos unionistes irlandeses del Democratic Unionist Party (10 escaños, 2 más que nel 2015) pa conformar gobiernu.

Descensu eleutoral de los nacionalistes escoceses

El tercer partíu con mayor representación ye’l SNP, que suma 35 parllamentarios, esto ye, 27 menos qu’hai dos años. Por contra, otres dos formaciones nacionalistes, los irlandeses Sinn Féin y los galeses Plaid Cymru, ameyoren resultaos al algamar 7 (2 más) y 4 (1 más), de manera respeutiva.

El fenómenu eleutoral del 2015, el partíu xenófobu y antieuropéu United Kingdom Independence Party (UKIP), baxó del 12,6 por cientu de los votos al 1,8, perdiendo tamién el so únicu escañu. Los otros partíos qu’algamaron representación foron el Liberal Democrats, con 12 representantes (4 más), y el Green Party, formación estraparllamentaria, con 1, a lo qu’hai que sumar un independiente.

A falta de los datos d’una circunscripción, los conservadores sumaron 13.650.900 votos (42,4 por cientu, un 5,5 por cientu más que nel 2015) por 12.858.652 de los llaboristes (40 por cientu, un 9,5 por cientu más). La participación foi del 68,7 por cientu, la más alta de les dos décades últimes.

Contador Estadistiques