Mauthausen, asturianos presos del nazismu

Una esposición y una conferencia del historiador Benito Bermejo van centrar los actos que van facese en Xixón con motivu del 60 aniversariu de la lliberación del campu de concentración nazi de Mauthausen, nel que tuvieron presos alredor de 100 republicanos asturianos. Los actos d'homenaxe nel campu austríacu de concentración van tener llugar el 8 de mayu, cola novedá de qu'esti añu va contase con una representación institucional asturiana y de familiares de los deportaos asturianos.

En collaboración cola Conseyería de Xusticia y Rellaciones Esteriores, l'Atenéu Obreru de Xixón organiza dellos actos n'Asturies pa dar a conocer la traxedia de Mauthausen entamando por una esposición nel muséu Barjola entitulada "Les solombres de la memoria", qu'incluye una una videoinstalación y semeyes de Pedro Timón. La muestra va tar abierta hasta'l 4 de mayu, fecha na que va dar una conferencia nel Antiguu Institutu de Xixón l'historiador Benito Bermejo, autor del llibru "Francisco Boix: el fotógrafu de Mauthausen". Los actos d'homenaxe van terminar el 14 de mayu con una ufierta floral nel monumentu a los asturianos deportaos en Xixón.

Mauthausen foi cárcele y tumba pa más de 7.000 deportaos españoles, bien d'ellos asturianos, en concreto 101 que se tengan documentaos. L'avanzada edá de los supervivientes fai qu'esti pueda ser ún de los últimos cabudaños de Mauthausen nos que los antiguos presos tean presentes. En faltando ellos, los campos de concentración van dexar de ser alcordanza pa ser historia, y, polo que toca a Asturies, nos últimos años la desapaición de Galo Ramos, Manuel Cortés y Avelino Fernández, trés de los últimos supervivientes, dexanos ensin gran parte d'esa memoria vivo. Con too y con ello, la memoria de Mauthausen caltiénse n'Asturies al traviés d'Angelita Andrada, representante n'Asturies de l'asociación Amical Mauthausen y que perdió al so padre naquel campu de concentración. El padre d'Angelita, repúblicanu esiliáu en Francia, morrió na cámara de gas cuando los nazis vieron que yá nun valía pa trabayar dempués de meses de trabayos forzaos en Mauthausen, un fechu dramáticu que-y condicionó la vida.