Matrícules con escudu?

Dempués de que, baxo'l mandatu del PP desapaecieren les lletres de les comunidaes autónomes de les matrícules de los coches, ábrese agora una posibilidá pa que les plaques de los automóviles tengan, otra vuelta, distintivu autonómicu.

De momentu nun ye seguro que vayan ponese distintivos autonómicos, pero'l ministru d'Interior José Antonio Alonso, reconoció yá en xunu y repitió ayeri qu'andaben tres d'un consensu coles comunidaes autónomes pa que s'enxerten símbolos identificativos de cada comunidá xunta la placa de la matrícula.

La novedá ye qu'estos símbolos posiblemente nun van tener por qué ser necesariamente lletres como la "O" identificativa d'Uviéu que llevaben los coches asturianos hasta l'añu 2.001 . Asina, l'alternativa bien podría ser l'usu del escudu de les comunidaes xunta los númberos y lletres de la matrícula, adoptando asina una solución asemeyada a la de Suiza o Alemaña.

La idea de poné-yos distintivos autonómicos a les matrícules choca coles patronales del automóvil , que foron los que nel so día-y apretaron al gobiernu del PP pa desaniciar les iniciales de les provincies que se poníen antiguamente, nes que víen una torga pa la reventa de coches de segunda mano. Agora, Anfac y otres asociaciones del sector recuperen esi argumentu y espliquen que ven na vuelta de los distintivos autonómicos un primer pasu pa poné-y impuestos nuevos al automóvil.