Másimu históricu del euru

La moneda europeo ta más que nunca en xuba llibre énte un dólar mui feble. La selmana pasada, l'euru algamó másimos históricos nel mercáu de divises con una cotización de 1,20 doláres-unidá. Esta xuba amenaza'l futuru empresarial européu pola perda de competitividá nos mercaos esteriores, mientres que la economía d´Estaos Xuníos presentó unes abultaes xubes. Nes bolses, la selmana pasada foi positiva pesllando un mes de Payares que, anque ensin grandes avances, foi l'octavu positivu na Bolsa de Madrid. Ya nun ta lloñe'l pieslle d´un añu que puede da-yos más d´una allegría a dellos inversores gracies al xorrecimientu del selectivu Ibex.

L´anuncia de la selmana pasada foi la fuercia que ta garrando la economía d´Estaos Xuníos con un xorrecimientu del PIB penriba´l 8%, una de les mayores xubes nos últimos venti años. Parez que la primer economía del mundiu ta entamando una sólida recuperanza económica. Ente les estadístiques de la selmana pasada destaquen tamién les rellacionaes cola Xunión Europea, que son les más negatives. Asina la confianza industrial de payares rexistra una cayida de siete puntos, la confianza del consumidor pierde dieciseyes puntos, el clima empresarial tien una probetaya xuba de dos décimes. Pero lo más significativo na Xunión Europea foi la crisis económica "non oficial" en Francia y Alemaña. El casu ye qu'a les dos potencies del Vieyu Continente nun-yos cuadren los númberos y pa tirar p´alantre ficieron un cambeu de normes del xuegu. Na práctica supónse que ya nun-yos interesa el Pactu d´Estabilidá y que pue tornase a la Europa de dos velocidaes. Pero lo peligroso ye qu'hai un riesgu d'empeoramientu de los datos macros de la Xunión Europea lo que emburriaría a un menor crecimientu economicu y a un xorrecimientu del paru a mediu plazu.

Bon andar el de la Bolsa de Madrid, que firmó l'octavu mes d´esti añu en positivo, raspiando una pequeña ganancia del 1,7% que pon la revolarización del selectivu Ibex-35 penriba´l 20% no que va de añu. La selmana tuvo un baxu volume de negociu, anque los inversores tan tornando cada vegada más a la renta variable. Por exemplu, el vienres pasáu negociárose 1.830 millones d´euros nel parqué madrilanu. Un de los valores con más xuba foi la estrena de la televisiva Antena 3, que, a la contra de tolos pronósticos fizo ganar perres asgaya al so ex propietariu, Telefónica. El casu ye que la televisión ya val 35 euros per acción dempués de salir a Bolsa a poco más de venti euros. Ente les xubes del vienres pasáu destaquen les d´Amadeus, Rede Eléctrica y Gas Natural. Nel tarrén de les perdes destacaron Gamesa y Mapfre. Bona selmana del Grupu Telefónica que vió como meyoraben los resultaos de Telefónica Móviles, ello xunta los ingresos pola venta d´Antena 3. L´Ibex trancó en 7.252,50 puntos.

Per primer vegada na hestoria, l´euru mangose penriba los 1,20 dólares unidá dientro d´un rally alcista que tien bien preocupaos a los economistes y empresarios del Vieyu Contiente. Según dellos rumores, los potentes inversores Soros y Buffet ficieron un apueste pol euru, lo que ensin dulda infló sobremanera a la moneda comunitario. Los analistes yá apunten que´l euru pue llegar a 1,50 dólares unidá.